AILEU, 05 abríl 2022 (TATOLI)—Xefe Suku Talitu, Postu Administrativu Laulara, Munisípiu Aileu, Matias Alves Sarmento, iha esperansa ba kandidadu Prezidente Repúblika na’in-rua ne’ebé kompete iha eleisaun prezidensiál segunda volta ne’e bainhira ida eleitu sai PR tenke koopera ho Governu hodi kontinua halo uma ba povu ka implementa programa Uma Kbiit Laek (UKL) ba povu kbiit laek sira.
Notísia Relevante: Komunidade husu Lú Olo pronunsia ba Governu dignifika veteranu ho pensaun vitalísia
“Ami-nia esperansa ba Prezidente Repúblika foun mak oinsá kontinua servisu hamutuk ho Governu hodi implementa programa Uma Kbiit Laek (UKL) ba povu tanba programa ne’e daudaun implementa ona hosi VIII Governu Konstitusionál importante tebes fó moris di’ak ba povu liu-liu povu kbiit laek,” Matias Alves Sarmento hateten ba Agência Tatoli iha Aileu Vila, tersa ne’e.
Implementasaun UKL iha suku Talitu implementa uma tolu ne’ebé konstrusaun finaliza ona hodi hein inaugura hodi oferese ba povu kbiit laek no daudaun identifika ona ba família hamutuk sia (9) mak sei benefísia tan programa refere.
Lidér komunitáriu ne’e iha esperansa mós ba Xefe Estadu períodu 2022-2027 hamutuk ho ezekutivu atu lori mós dezenvolvimentu ba to’o área rurál sira hodi hadi’a estrada, dada bee-moos, eletrisidade nomós hadia setór edukasaun, saúde hodi fó impaktu direta ba povu nia moris di’ak.
“Ida-ne’e mak ami nia esperansa tanba tinan hirak ne’e ho situasaun COVID-19 no dezastre naturál sai afeta tebes ba dezenvolvimentu,” nia dehan.
Komunidade Martina Alves hateten, Prezidente Repúblika mai presiza hakuak ema hotu promove diálogu entre lidér nasionál tanba durante ne’e lidér sira laiha komunikasaun di’ak hamosu impase polítiku beibeik, nune’e tempu ona presiza hamutuk hodi lori dezenvolvimentu ba nasaun.
Aleinde ne’e, José Martins espres ania hanoin katak nu’udar joven ba Xefe Estadu foun atu tau atensaun no promove relasaun internasionál ho nasaun seluk hodi lori investór mai investe iha Timor-Leste atu bele loké kampu traballu.
“Ami joven presiza kampu traballu, tanba durante ne’e joven barak ramata ona estudu iha ensinu superiór laiha servisu no lahetan servisu,” nia dehan.
Notísia Relevante: Konstrusaun UKL 2021 iha territóriu nasionál atinje ona 75%
Jornalista : Nelson de Sousa
Editór : Cancio Ximenes
