BOBONARO, ELEISAUN, HEADLINE, POLÍTIKA

Lú Olo garante ona estabilidade governativa no respeitu ba konstituisaun

Lú Olo garante ona estabilidade governativa no respeitu ba konstituisaun

Kandidatu Prezidente Repúblika, Francisco Guterres Lú Olo, hala’o kampaña dalimak ho tipu diálogu iha jináziu, Maliana Vila, kuarta (06/04) ne’e. Imajen Tatoli/Anito Soares.

BOBONARO, 06 abríl 2022 (TATOLI)—Vise Prezidente Partidu Libertasaun Populár (PLP), Deometro Carvalho, hateten plataforma koligasaun hosi partidu Fretilin, PLP, KHUNTO no forsa polítiku sira seluk fó apoiu ba kandidatu Prezidente Repúblika, Francisco Guterres ‘Lú Olo, iha eleisaun segunda volta tanba durante mandatu hanesan Xefe Estadu atuál hatudu ona garante estabilidade governativa no respeitu ba konstituisaun.

Notísia Relevante: Lú Olo la viola konstituisaun durante mandatu 2017-2022

“Razaun plataforma koligasaun apoiu kandidatu Prezidente Repúblika Lú Olo ba mandatu daruak tanba iha nia mandatu dahuluk hatudu ona Prezidente Repúblika ida haraik an, pesiénsia no garante estabilidade governativa no respeitu ba konstituisaun mezmu sira balun hatudu sira-nia an aas liu fali Tribunál ne’ebé halo interpretasaun ba asuntu hatudu hakarak sama lei sira,” Vise Prezidente PLP ne’e hateten iha ambitu kampaña kandidatu Lú Olo ho tipu diálogu iha jináziu, Maliana Vila, kuarta ne’e.

Nia husu, militante no apoiante sira hotu atu mantein vijilansia makaas garante Prezidente Repúblika ida lori moris di’ak ba povu.

Reprezenta Partidu KHUNTO, Vital dos Santos, hateten fó apoiu ba kandidatu Lú Olo tanba durante nia mandatu dahuluk hatudu susesu boot servisu kombate hasoru COVID-19 mezmu iha nasaun barak enfrenta ema mate barak maibé Timor-Leste númeru kazu óbitu uitoan tanba Lú Olo konsege jere COVID-19 ho di’ak.

KHUNTO agora sai ona aliadu estratéjiku hamutuk ba eleisaun prezidensiál segunda volta bele mós aliadu ne’e la’o to’o rohan laek.

“KHUNTO laiha rezerva lidér supremu foti desizaun iha kraik firme ezekuta orden hodi fó apoiu tomak ba vitória Lú Olo nian,” nia dehan.

Prezidente Partidu Os Verdes, António Lelahunu Cruz, afirma fó apoiu ba Lú Olo  iha eleisaun primeira no segunda volta tanba durante mandatu ho vizaun hanesan ho Os Verdes no mós tuir  partidu istóriku Fretilin  ne’ebé ho modelu reprezenta hakarak harii sosiedade rejiliente, inkluzivu no sustentavel.

Nia dehan, apoiu Lú Olo to’o daudaun ne’e partidu Os Verdes eziste legalmente iha Timor-Leste hodi rejista ofisiál iha Ministériu Justisa no hein proklama hosi Tribunál Rekursu.

“Os Verdes servisu makaas iha baze no husu mós forsa konjunta hamutuk ho partidu seluk hodi  fó votu ba Lú Olo iha 19 abríl mai, atu bele  sai  Prezidente Repúblika iha responsavilidade ba povu ho dalan loos,” nia dehan.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!