ELEISAUN, HEADLINE, MUNISÍPIU, NASIONÁL, VIQUEQUE

CNE Viqueque kontinua halo edukasaun votante ba eleitór

CNE Viqueque kontinua halo edukasaun votante ba eleitór

Diretór CNE munisípiu Viqueque, Honorio da Cruz. Imajen TATOLI/Vitorino Lopes da Costa

VIQUEQUE, 07 abril 2022 (TATOLI)–Diretór Komisaun Nasionál Eleisaun (CNE, sigla portugés) munisípiu Viqueque, Honorio da Cruz, informa, parte komisaun kontinua halo edukasaun votante ba eleitór sira nune’e bele ezerse direitu votu.

“Ami daudaun esforsu atu minimiza votu nulu, ne’ebé ita konsidera votu nulu a’as. Tanba ne’e, ami-nia ekipa sira kontinua halo edukasaun votante ba eleitór sira,” Diretór CNE hateten ba Agência TATOLI, iha ninia knaar fatin, kinta ne’e.

Nune’e, ofisiál eleitorál iha terreinu kontinua komunika ba parte brigada sira hodi halo kontinuasaun edukasaun votante, nune’e eleitór sira bele hetan informasaun sufisiente hodi ezerse direitu votu ho di’ak.

“Ha’u kontinua halo komunikasaun ho Diretór Sekretaridu Tékniku Administrasaun Eleitorál (STAE) munisípiu Viqueque hodi haree asuntu hirak ne’e,” nia akresenta.

Notísia relevante: STAE-CNE Viqueque hahú distribui materiál eleisaun ba sentru votasaun 92

Ekipa ofisiál supervizaun halo esforsu hodi  implementa edukasaun votante eleitorál sira iha suku hamutuk 36 iha munisípiu Viqueque.

“Ami esforsu halo edukasaun vontante ba suku 36 iha munisípiu Viqueque molok tama ba loron Eleisaun Prezidensiál iha 19 fulan abril 2022,” nia tenik.

Iha eleisaun primeira volta iha loron 19 marsu iha munisípiu Viqueque eleitór ne’ebé la partisipa eleisaun hamutuk 14.629, nune’e CNE esforsu hodi fahe informasaun liuhosi meiu komunikasaun hodi sidadaun sira  ne’ebé la partisipa eleisaun primeira volta bele partisipa fali.

Tuir dadus iha munisípiu Viqueque, eleitór ne’ebé rejistadu hamutuk 57.881, enkuantu partisipa eleisaun 43.252 reprezenta 74,73%.

Jornalista : Vitorino Lopes da Costa

Editora      : Julia Chatarina

iklan
iklan

Leave a Reply

iklan
error: Content is protected !!