NASIONÁL, ELEISAUN, HEADLINE, MANATUTO, MUNISÍPIU

Horta iha opsaun tolu dezenvolve Soibada

Horta iha opsaun tolu dezenvolve Soibada

Kandidatu Prezidente Repúblika hosi Partidu CNRT períodu 2022-2027, José Ramos Horta, halo mini-kampaña prezidensiál segunda volta, iha Antigu Koléjiu ba mane iha Soibada, munisípiu Manatuto, kinta (07/04). Imaje TATOLI/Jogerjo Guterres

MANATUTO, 07 abril 2022 (TATOLI)–Kandidatu Prezidente Repúblika (PR) hosi Partidu Congresso Nacional de Reconstrução de Timor (CNRT) períodu 2022-2027, ho númeru sorteiu 01, José Ramos Horta, iha opsaun tolu dezenvolve postu administrativu Soibada, munisípiu Manatuto bainhira eleitu.

Kandidatu Prezidente Repúblika hosi Partidu CNRT períodu 2022-2027, José Ramos Horta, halo mini-kampaña prezidensiál segunda volta, iha Antigu Koléjiu ba mane iha Soibada, munisípiu Manatuto, kinta (07/04). Imaje TATOLI/Jogerjo Guterres

“Kuandu ha’u mai ko’alia ho Padre, katak ita tenki ko’alia ho Amu Bispu hodi fó mandatu ida ba ha’u informál. Hateten de’it mai ha’u katak líder grupu ida fó ideia, entaun ha’u prepara programa ida hodi fó opsaun tolu ba igreja, ne’ebé bele hili ida, ezemplu Soibada bele sai hanesan sentru boot ba peskiza médika no sientífika, sai sentru turístiku hodi halo retiru ba atividade oioin, no seluk mak loke sentru tékniku profisionál ho nível internasionál,” Horta hato’o komprimisu polítiku durante kampaña prezidensiál segunda volta ho tipu mini-kampaña iha Antigu Koléjiu ba mane iha Soibada, munisípiu Manatuto, kinta ne’e.

Notísia relevante: Vizita merkadu Manleu, Horta promete hadi’a kondisaun

Apoiante sira partisipa mini-kampaña prezidensiál segunda volta hosi Kandidatu Prezidente Repúblika hosi Partidu CNRT períodu 2022-2027, José Ramos Horta, iha Antigu Koléjiu ba mane iha Soibada, munisípiu Manatuto, kinta (07/04). Imaje TATOLI/Jogerjo Guterres

Ba inisiativa ne’e, Horta dehan la presiza forma ekipa formál ida hodi realiza opsaun sira, maibé liuhosi ekipa informál ka orienta direta de’it mós bele, importante orientasaun ne’e mai hosi igreja katólika.

Nia konsidera, postu administrativu Soibada bele sai sentru di’ak maibé la’ós ketak, tenki liga ho postu administrativu Laclubar hodi bele halo produsaun ai-fuan barak liu ho kualidade di’ak liután.

Apoiante sira partisipa mini-kampaña prezidensiál segunda volta hosi Kandidatu Prezidente Repúblika hosi Partidu CNRT períodu 2022-2027, José Ramos Horta, iha Antigu Koléjiu ba mane iha Soibada, munisípiu Manatuto, kinta (07/04). Imaje TATOLI/Jogerjo Guterres

“Hanesan halo chá no produsaun kafé, hafoin haree animál fuik sira tanba uluk manu kakatua barak tebes maibé agora kuaze laiha. Tanba ne’e tenki hatama filafali, manu ne’e la’ós iha Laclubar de’it maibé iha mós Natabora. Sientífikamente bele halo tanba nasaun seluk hanesan Cuba uluk sira lakon tiha Makikit maibé amerikanu sira hatama filafali. Ita tenki proteje natureza no meiu ambiente,” Kandidatu PR tenik.

Iha biban hanesan, Kandidatu PR independente períodu 2022-2022 ba eleisaun primeira volta no hanesan mós Jerasaun Manatuto-oan, Rogerio Tiago Lobato, otimista katak Horta sei tau-matan ba postu ne’e.

Kandidatu Prezidente Repúblika hosi Partidu CNRT períodu 2022-2027, José Ramos Horta, akompaña ho Rogerio Tiago Lobato inklui ekipa apoiante seluk, halo mini-kampaña iha Antigu Koléjiu ba mane iha Soibada, munisípiu Manatuto, kinta (07/04). Imaje TATOLI/Jogerjo Guterres

“Soibada Nossa Senhora Aitara sai Santuáriu nasionál ne’e hanesan Fátima iha Portugal. Ha’u fiar katak Horta bainhira sai Prezidente Repúblika sei la haluha Soibada. Ami husu de’it katak Soibada ne’e pelu menus sai hanesan patrimóniu Timor-Leste nian, tanba ema matenek barak sai hosi rai ida-ne’e. Tanba ne’e maka tenki halo netik buat ruma, nune’e bele hetan nafatin iha mapa polítiku no istória Timór nian,” Rogerio tenik.

Abitante husu tau-matan ba infraestrutura bázika

Abitante Soibada, Domingos Cruz da Silva. Imajen TATOLI/Jogerjo Guterres

Iha ámbitu ne’e, Abitante Soibada, Domingos Cruz da Silva, koñese Kandidatu PR, Horta desde tinan 1974-1975, ne’ebé haree hosi kapasidade koñesidu iha mundu.

“Ami iha esperansa, nia merese sai Prezidente Repúblika dala-ida tan ba períodu ida-ne’e. Bainhira eleitu, ami povu sira ejize liu maka tau-matan ba infraestrutura bázika, liliu bee-moos, eletrisidade no estrada rurál hodi korre netik ami hosi susar,” Domingos dezeja.

Abitante Laclubar, Nicolau da Costa. Imajen TATOLI/Jogerjo Guterres

Nune’e mós, Abitante Laclubar, Nicolau da Costa, husu ba Horta, bainhira hetan fiar hosi povu, tenki koopera ho Governu hodi dada eletrisidade ba suku Fatumakerek.

“Ami-nia suku ai-rin eletrisidade iha ona, maibé to’o agora seidauk dada eletrisidade. Ha’u koñese Ramos Horta, tanba ne’e mak ha’u apoiu nia tanba nia koñesidu iha rai-li’ur, tanba ne’e ami fiar nia bele korre povu hosi kiak no mukit,” nia tenik.

Durante diálogu, hetan supervizaun hosi Komisaun Nasionál Eleisaun (CNE, sigla portugés), observadór internasionál no hetan seguransa hosi Polísia Nasionál Timor-Leste (PNTL).

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!