BAUCAU, ELEISAUN, HEADLINE, POLÍTIKA

Mate Restu apela delegadu sira tama-sai uma luta ba Lú Olo nia vitória

Mate Restu apela delegadu sira tama-sai uma luta ba Lú Olo nia vitória

Militante, simpatizante no apoiante Kandidatu Prezidente Repúblika, Francisco Guterres Lú Olo, partisipa kampaña dala-neen (6) iha Sentru Konvensaun Baucau. Imajen Tatoli/Anito Soares.

BAUCAU, 07 abríl 2022 (TATOLI)—Prezidente Interinu Partidu Libertasaun Populár (PLP), Abrão Freitas‘Mate Restu’, apela ba delegadu ho militante sira atu transmite tutan programa kandidatu Prezidente Repúblika periódu 2022-2027 ho númeru sorteiu rua (2), Francisco Guterres ‘Lú Olo’, tama-sai suku hodi fó vitória iha eleisaun segunda volta.

Notísia Relevante:  Reeleitu: Lú Olo sei hametin relasaun instituisionál ho órgaun soberania seluk

Prezidente Interinu PLP, Abrão Freitas ‘Mate Restu’. Imajen Tatoli/ Egas Cristóvão.

“Baucau tenke manán liu maibé presiza asaun determina rezultadu, nune’e husu imi sira-ne’ebé ohin mai iha ne’e   tun fila-fali transmite tutan programa ne’ebé kandidatu fó ona hodi influénsia populasaun iha Baucau tomak, tanba ita hakarak lori ita-nia manu amán Lú Olo sai Prezidente Repúblika ba mandatu daruak,” Mate Restu hatetetn iha kampaña ho tipu diálohu hosi kandidatu Lú Olo, iha Sentru Konvensaun Baucau, kinta ne’e.

Nia mós propoin, ekipa ne’ebé antes la’o iha eleisaun primeira volta hosi partidu KHUNTO, Fretilin, PLP, Os Verdes atu servisu makaas hamutuk liután iha baze no tempu eleisaun.

Prezidente Interinu ne’e hateten, razaun PLP fó apoiu ba Lú Olo iha eleisaun segunda volta tanba kandidatu ida-ne’e hala’o nia mandate durante ne’e nia hakruuk de’it ba konstituisaun.

“PLP iha primeira volta foti pozisaun vota konsiénsia maibé hanesan partidu polítiku iha espasu responde ba kestaun ida tanba kandidatu balun ho intensaun atu dizolve Parlamentu Nasionál nune’e deside segunda volta fó apoiu ba Lú Olo ne’ebé kumpre ba konstituisaun de’it,” nia hateten.

Nune’e mós, ema-ne’ebé fuan boot ba Estadu responde interrese nasionál la’ós partidu ho ódiu vingansa no presiza Xefe Etadu ida di’ak hodi kondús Estadu ba oin, ho ida-ne’e laiha dalan atu disolve PN no hatun VIII Governu Konstitusionál ne’ebé lidera hosi Primeiru-Ministru, Taur Matan Ruak.

“Iha eleisaun segunda volta atu konfirma votu aumenta makaas li tán iha Baucau, ho ida-ne’e lori Lú Olo ba mandatu daruak nomós laiha dalan disolve Parlamentu Nasionál ne’ebé ho VIII Governu lidera hosi Jenerál Taur Matan Ruak,” nia dehan.

Reprezenta Partidu KHUNTO, Luis Roberto, hateten Fretilin mak sai aman no inan ba demokrásia ne’ebé hatudu no fó oportunidade hodi partidu jerasaun foun sira eziste mós hodi valoriza demokrásia iha Timor-Leste, nune’e presiza haree aman ida-ne’ebé mesere mak kandidatu Lú Olo.

Tuir nia, durante nia mandate ne’e Lú Olo hatudu ona kompromisu primeiru mak kria pás no estabilidade, haburas unidade nasionál sai xave ba dezenvolvimentu.

“Presiza hili kandidatu ema pasiénsia, simplesidade, responsabilidade, valoriza konstituisaun la kria krize mak ita-nia aman Lú Olo,” nia dehan.

Tanba ne’e, nia garante katak militante KHUNTO iha munisípiu Baucau sei fó hotu votu ba kandidatu iha eleisaun mai no votu sei manán maiória.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!