ELEISAUN, HEADLINE, MUNISÍPIU, NASIONÁL, VIQUEQUE

Lú Olo promete bainhira reeleitu sai PR sei hadi’a povu-nia moris

Lú Olo promete bainhira reeleitu sai PR sei hadi’a povu-nia moris

Kandidatu Prezidente Repúblika hosi Partidu FRETILIN períodu 2022-2027, ho númeru sorteiu 02, Francisco Guterres ‘Lú Olo’, hato’o kompromisu polítiku durante kampaña prezidensiál tipu diálogu, iha kampu futeból, Viqueque villa, sesta (08/04). Imajen TATOLI/Vitorino Lopes da Costa

VIQUEQUE, 08 abril 2022 (TATOLI)–Kandidatu Prezidente Repúblika (PR) hosi Partidu Frente Revolusionária de Timor-Leste Independente (FRETILIN) períodu 2022-2027, ho númeru sorteiu 02, Francisco Guterres ‘Lú Olo’, promete bainhira reeleitu sei hadi’a povu-nia moris liuhosi kolabora ho Governu ba implementasaun programa.

“Ha’u rekandidatu ba Prezidente Repúblika atu halo Estadu ida-ne’e la’o di’ak no hametin instituisaun Prezidente Repúblika ho orgaun ezekutivu, serbisu hamutuk ho Primeiru-Ministru hala’o knaar ho di’ak implementa programa kona-ba  hadia povu-nia moris , fornese bee-moos, hadi’a eskola, hadi’a setór agrikultura no hadi’a estrada. Orgaun ezekutivu nia programa atu la’o di’ak, presiza Prezidente Repúblika ida iha ninia sorin, tanba ne’e ha’u kandidata-an hodi serbisu hamutuk ho órgaun ezekutivu ne’ebé atu mai,” Kandidatu PR, Lú Olo hato’o kompromisu polítiku, durante kampaña ho tipu diálogu, iha kampu futeból, Viqueque villa, sesta ne’e.

Notísia relevante: Apuramentu Viqueque, Lú Olo lidera ho votu 20.962 reprezenta 49,79%

Bainhira reeleitu, Lú Olo hakarak influénsia Governu aselera prosesu dezenvolvimentu.

“Ha’u sei haree mós polítika Governu ba setór agrikultura, hanesan hadi’a irrigasaun sira iha Timór laran hodi povu hasa’e produsaun ai-han rai-laran. Nune’e mós, estrada, atu povu bele lori produtu asesu merkadu maibé estrada kontinua a’at sei difikulta povu-nia mobimentu,” nia akresenta.

Ámbitu kampaña prezidensiál tipu diálogu hosi Kandidatu Prezidente Repúblika hosi Partidu FRETILIN períodu 2022-2027, ho númeru sorteiu 02, Francisco Guterres ‘Lú Olo’, iha kampu futeból, Viqueque villa, sesta (08/04). Imajen TATOLI/Vitorino Lopes da Costa

Nia rekoñese, maski kestaun hirak ne’e PR labele tau-matan direta, maibé hanesan dever ida atu lori povu ba moris di’ak.

“Viqueque-oan sira, ha’u rekandidatu-an ba Prezidente Repúblika hodi serbisu hamutuk ho Governu hodi hadi’a povu-nian moris. Ha’u sei kumpre funsaun nu’udar Prezidente repúblika hodi garante pás no estabilidade iha rai-laran, nune’e atu funsiona instituisaun sira la’o normál hodi hala’o dezenvolvimentu integradu no sustentabilidade,” nia tenik.

Antes ne’e, iha eleisaun prezidensiál segunda volta iha loron 19 marsu Lú Olo hetan votu iha munisípiu Viqueque hamutuk 20.962 reprezenta 49,79%.

Populasaun Uatucarbau preokupa ho setór saúde

Iha fatin hanesan, eis xefe suku Irabin de Cima, postu administrativu Uatucarbau, munisípiu Viqueque, Eujévio da Costa, hateten, populasaun Uatucarbau preokupa liu saúde tanba seidauk la’o di’ak, nune’e bainhira reeleitu, husu Lú Olo hamutuk ho Governu tau-matan ba setór saúde.

“Ami Uatucarbau to’o ohin loron parte saúde seidauk la’o di’ak. Tanba ne’e, husu kandidatu karik reeleitu, tau-matan netik ba saúde. Tanba iha postu saúde Uatucarbau daudaun laiha bee-moos no kondisaun saúde ladún di’ak, difikulta atendimentu ba ita-nia populasaun,” nia tenik.

Nia husu mós ba Governu atu aumenta karru funeráriu ba postu Uatucarbau hodi fó atendimentu ba abitante lokál.

Daudaun Viqueque iha karru funeráriu rua hodi atende nesesidade populasaun sira hosi postu lima.

Nune’e mós, Tuir Abitante postu Uatucarbau, Tome Freitas, Governu presiza tau-matan ba estrada ne’ebé to’o agora seidauk hadi’a, tanba problema ne’e sai difikuldade ba povu.

“Presiza dalan di’ak atu povu asesu no lori produtu lokál ba merkadu hodi hetan osan sustenta ba família. Ami Uatucarbau bainhira atu tun mai Viqueque susar tebes tanba ho kondisaun estrada a’at, halo ita-nia isin kolen, presiza lori oras barak maka foin to’o. Ho ida-ne’e ami hato’o ba Kandidatu Prezidentw Repúblika hodi haree povu-nia preokupasaun sira ne’e,” nia tenik.

Abitante ne’e dehan, hosi Uatucarbau bá Viqueque, dalan integra ho mota, halo karreta halai tuir de’it mota.

Aleinde ne’e, povu Uatucarbau preokupa mós ho kondisaun irrigasaun, tanba povu atu halo natar presiza irrigasaun di’ak.

“Iha Uatucarbau iha irrigasaun barak a’at no halo natar, maibé barak to’o agora sai abandonadu,” nia salienta.

Hadi’a estrada Uatulari-Viqueque

Koodenadora Organizasaun Populár Muller Timór (OPMT) FRETILIN Uatulari, Juvita Soares, husu Kandidatu PR, Lú Olo bainhira reeleitu sai Prezidente Repúblika ba períodu 2022-2027, serbisu hamutuk ho Governu hodi hadi’a estrada Uatulari liga bá munisípiu Viqueque.

“Ami Uatulari estarada liga mai Viqueque ho kondisaun a’at tebes, atu tun mai Viqueque lori oras barak maka foin to’o. Tanba ne’e, ha’u reprezenta populasaun Uatulari husu kandidatu Lú Olo bainhira reeleitu karik, kolabora ho Governu hodi hadi’a ami-nia dalan. Ohin ami tun mai tarde tanba kondisaun estrada. Tanba ne’e, kandidatu tenke haree, Uatulari iha eleisaun sira FRETILIN sempre manán maioria, ami-nia perioridade maka estrada,” nia hameno.

Nune’e, nia husu atu rezolve estrada iha tempu badak nia laran tanba ne’e hanesan esperansa hosi populasaun Uatulari hodi halo movimentu lori produtu lokál hodi fa’an iha merkadu.

Koordenadora mós husu ba Parlamentu Nasionál, bainhira halo diskusaun ruma ho Governu, tenke tau perioridade ba estrada postu Uatulari.

Entrentantu  iha kampaña tipu diálogu ne’e hetan seguransa másimu hosi Polísia Nasionál Timor Leste (PNTL), supervisizaun hosi Komisaun Nasionál Eleisaun (CNE, sigla portugés) nos htan partisipasaun hosi militante no simpatizaunte FRETILIN, kuadru Partidu Libertasaun Populár (PLP), Os Verdes, Kmanek Haburas Unidade Nasionál Timor Oan (KHUNTO) no Uniaun Nasionál Juventude Maubere (UNIJMA) CPD-RDTL munisípiu Viqueque.

Jornalista : Vitorino Lopes da Costa

Editora     : Julia Chatarina

iklan
iklan

Leave a Reply

iklan
error: Content is protected !!