DILI, 08 abríl 2022 (TATOL)— Portavóz Komandu Jerál Polisia Nasionál Timor-Leste (PNTL), Superintendente Xefe Armando Monteiro, informa Komandu Munisípiu Liquiça, konsege detein ona suspeitu AF ne’ebé taa mate Francisco dos Santos ho Edito Soares iha Suku Fahilebu, Postu Administrativu Bazartete, Munisipiu Liquiça, kinta (07/04), tuku 9:30, dader.
Hafoin akontesementu suspeitu AF konsege halai lakon hosi fatin akontesimentu, maibe liutiha oras balun, Komandu PNTL Munisipiu Liquica, liuhosi Polisia Eskuadra Bazatete, halo kedan detensaun iha sela detensaun komandu PNTL Liquica.
“Suspeitu AF rasik, detein ona iha sela Komandu PNTL Munisipiu Liquiça, hodi halo hela investigasaun ne’ebé investigasaun kuaze konklui ona, nune’e orsida tuku 14:00 komandu PNTL Liquica lori suspeitu AF ba primeiru interrogatóriu iha Tribunal Distritál Dili (TDD),” Portavóz Superintendente Xefe Armando Monteiro, hateten ba Jornalista sira liuhosi konferensia impresa iha kuartél Jerál, Caicoli, sesta ne’e.
Portavóz PNTL ne’e dehan iha prosesu investigasaun identifika katak suspeitu AF ne’e la’ós ema ho difisiénsia mentál.
“Tuir relatóriu investigasaun ne’ebé maka Komandu PNTL Munisipiu Liquiça, relata mai Komandu Jerál PNTL ne’e katak, Autoridade Lokál no ema sira iha iha lokál krime, sira katak suspeitu ema ne’ebé saúde normál,” nia esplika.
Motivu kazu omesídiu ne’e, Portavóz Komandu PNTL, informa suspeitu AF uza katana taa vítima nain-rua tanba goza malu bainhira partisipa serbisu ba preparasaun atu simu vizita illas São João de Brito ba suku refere.
“Suspeitu too fatin serbisu atu hamoos duut, maka mosu goza malu halimar no vítima nain-rua hamanasa, maibé supeitu hanoin hamanasa ba nian, nune’e derepente suspeitu AF foti katana hodi taa vitima na’in-rua nia kakorok hodi mate kedan iha fatin,” dehan Xefe Departementu Relasaun Publiku ne’e.
Hafoin akontesimentu ne’e, Komandu PNTL Liquiça transporta kedan mate isin na’in-rua mai iha Hospitál Nasionál Guido Valadares (HNGV) atu halo prosesu autópsia.
Notísia relevante: PNTL: ema ho defisiénsia mentál oho ema na’in-rua iha Liquiça
Jornalista: Natalino Costa
Editór : Florencio Miranda Ximenes
