BAUCAU, ELEISAUN, HEADLINE, MUNISÍPIU, NASIONÁL

Horta hakarak koopera ho parte hotu dezenvolve ekonomia

Horta hakarak koopera ho parte hotu dezenvolve ekonomia

Kandidatu Prezidente Repúblika hosi Partidu CNRT períodu 2022-2027, José Ramos Horta. Imajen TATOLI/Jogerjo Guterres

BAUCAU, 09 abril 2022 (TATOLI)–Kandidatu Prezidente Repúblika (PR) hosi Partidu Congresso Nacional de Reconstrução de Timor (CNRT) períodu 2022-2027, ho númeru sorteiu 01, José Ramos Horta, hateten, bainhira eleitu sei koopera ho parte hotu hodi dezenvolve ekonomia rai-laran.

“Kampaña hotu ita tenki hanoin futuru ba rai ida-ne’e, hanesan ekonomia tenki númeru um maibé atu la’o di’ak tenki iha Governu forte, lideradu hosi ema matenek,” Horta hato’o kompromisu polítiku durante mini-kampaña prezidensiál segunda volta iha Triloka, munisipiu Baucau, sábadu ne’e.

Notísia relevante: Domin no Alin Laek husu Baucau-oan vota ba Ramos Horta

Ámbitu kampaña prezidensiál segunda ronda hosi Kandidatu Prezidente Repúblika hosi Partidu CNRT períodu 2022-2027, José Ramos Horta, iha Triloka, sábadu (09/04). Imajen TATOLI/Jogerjo Guterres

Nia konsidera, Prezidente Repúblika tenki halibur ema hotu, tenki atensaun maka’as ba polítika rejionál, internasionál, inklui situasaun ekonómika.

“Hamutuk ho Primeiru-Ministru ha’u ko’alia beibeik, presiza ajuda bolu ema ruma hosi li’ur ko’alia via online tanba agora meiu komunikasaun fasil loos atu ko’alia. Kuandu COVID-19 hahú ha’u ko’alia ho sientista sira iha Israel, Austrália, Alemaña atu kompriende problema ne’e, ko’alia ho ema barak kona-ba ekonomia atu ita aprende, ne’e papel líder,” nia dehan.

Ámbitu kampaña prezidensiál segunda ronda hosi Kandidatu Prezidente Repúblika hosi Partidu CNRT períodu 2022-2027, José Ramos Horta, iha Triloka, sábadu (09/04). Imajen TATOLI/Jogerjo Guterres

Tanba ne’e, Horta konsidera presiza haree desizaun kona-ba ekonomia no bainhira nia eleitu sai PR sei tuun ko’alia no diskute ho líder sira hotu hodi haree asuntu ekonomia, tanba daudaun ne’e ekonomia sai ameasa boot.

“Dadaun ne’e folin mina sa’e, aleinde ne’e folin sasán hotu mós sa’e, enkuantu valór forsa dolar nian tun, situasaun ida ne’e preokupante tebes,” nia salienta.

Iha fatin hanesan, família Saudozu Nicolau Lobato, Rogerio Tiago Lobato, hateten, Ramos Horta ema ida matenek no iha esperiénsia barak iha komunidade internasionál.

“Iha tinan 1975 bainhira funu hahú, país Estadu Unidu Amérika apoia Indonézia atu invade ita-nia rain. Durante tinan 20-resin nia serbisu iha rai-li’ur hanesan diplomata númeru um Timor-Leste nian atu muda pozisaun EUA a-favór mai Timór,” Rogerio Lobato fó sasin.

Tanba ne’e maka, kandidatu PR períodu 2022-2027 primeira volta ne’e husu ba populasaun Baucau sira atu hili ema ida ho kualidade, líder ne’ebé halo timor-oan hamutuk, no lider ne’ebé hakarak timor-oan tomak haree malu hanesan maun ho alin.

Durante diálogu ne’e hetan supervizaun hosi Komisaun Nasionál Eleisaun (CNE, sigla portugés), observadór internasionál no hetan seguransa hosi Polísia Nasionál Timor-Leste (PNTL).

Jornalista : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!