BAUCAU, 11 abril 2022 (TATOLI) – Kandidatu Prezidente Repúblika, José Ramos Horta, sei husu apoia direta ba embaixada sira iha Timor-Leste, liuhusi sira-nian programa atubele konstroe estrada ba área izoladu iha territóriu país nomós tulun iha setór edukasaun.
Ramos Horta hatete iha diálogu iha suku Soba, Postu Administrativu Laga, Munisípiu Baucau, no salienta katak sei fó prioridade ba aldeia Assanuno no Fatiliri suku refere.
“Hau sei ko’alia ho embaixada sira hanesan Koreia Súl, Xina, Austrália no Amérika atubele hadi’a ona buat balun hanesan estrada rurál no apoia nutrisaun ba eskola sira. Buat hirak ne’e, ha’u bele husu ho sira direitamente, no sira bele halo desizaun. Ita lalika hein Governu de’it”, afirma Ramos Horta.
Kona-ba preokupasaun eletresidade nian, nia parte buka solusaun mak apoia painél solár hodi tau iha uma ida-idak, tambá harii liña eletrisidade presiza orsamentu boot.
“Ha’u sei tau-matan ba imi-nian preokupasaun. La’ós deit iha fatin ida ne’e [iha Soba], maibé fatin seluk ne’ebé mak izoladu tebes. Ba ha’u mak kualidade edukasaun, merenda eskolár tanba ki’ikoan sira tenke han di’ak no ho aifuan barak tanba iha vitamina C ba sira”, salienta.
Premiadu Nobel da Paz lembra katak Governu mak aprezenta programa prioridade iha Parlamentu Naisonál.
“Ha’u la promete buat barak no hanesan Prezidente Repúblika sei ko’alia maka’as no koopera ho Governu atu hadi’a povu nia moris no shatán preokupasaun iha aldeia no suku ida ne’e”, tenik.
Xefe Aldeia Assanunu, Geremias Boavida Guterres, hatete nia fatin seidauk asesu ba estrada no eletresidade.
“Husu ba kandidatu Ramos Horta manán karik bele loke mós ami-nian estrada, tanba atu bá merkadu mós susar no tinan 20-resin la asesu ba eletresidade”, afirma.
Nune’e mós delegadu FRETILIN, Fransisco de Jesus Ximenes, lembra katak orsamentu aprova iha Parlamentu Nasionál, maibé ninia ezekusaun iha baze la adekuada.
“Ami fó apoiu ba maun Ramos Horta no maun boot Xanana Gusmão, tambá durante ami-nian partidu ukun, maibé la realiza sira-nian promesa iha setór importante sira hanesan saúde, estrada no eletresidade”, nia deklara.
Jornalista: Domingos Piedade Freitas
Editora: Maria Auxiliadora
