BOBONARO, 11 abríl 2022 (TATOLI) – Ofisiál eleitorál hamutuk na’in 1.500 hosi Sekretariadu Tékniku Administrasaun Eleitorál (STAE) iha munisípiu Bobonaro, segunda ne’e prátika simulasaun hodi garante kualidade serbisu ho susesu iha eleisaun prezidensiál volta duaruak períodu 2022-2027.
Diretór STAE Munisípiu Bobonaro, Mariano Viegas Amaral, informa formasaun durante loron ida ne’e foka liu ba lei no regra eleisaun nian, nune’e idak-idak bele halo ninia funsaun ne’ebé atribui ho loloos hodi garante tranparánsia no neutralidade atubele fó susesu ba festa demokrasia ne’e.
“Ita realiza formasaun ba ofisiál eleitorál sira iha postu hotu-hotu ho nia ojetivu atu hakbiit tán sira -nia koñesimentu kona-ba prosesu votasaun sira halo simulasaun ba atividade sira iha sentru votasaun ba prosesu eleisaun la’o to’o kontajen,” nia informa ba jornalista sira iha salaun administrasaun munisípiu Bobonaro.
Tuir nia, ofisiál eleitorál sira iha direitu tomak atu hili kandidatu ida no bele envolve iha partidu polítiku, maibé bazea kontratu ne’ebé STAE atribui ba sira durante loron ida ka rua de’it.
Iha semana kotuk STAE halo ona avaliasaun ho brigada na’in-130 mai hosi postu administrativu Atabae na’in-13, Balibo na’in-20, Cailaco na’in-15, Maliana na’in-28, Bobonaro na’in-40 no Lolotoé na’in-14, hodi hadi’a lákuna sira-ne’ebé akontese iha eleisaun volta dahuluk.
Sentru votasaun 130 no estasaun votu hamutuk 150, nune’e ofisiál eleitorál hirak-ne’e koloka kada estasaun votu ema na’in-10.
Ofisiál eleitorál iha munisípiu Bobonaro hamutuk 1.500 kompostu hosi postu administrativu Maliana ema na’in-360, Cailaco na’in-150, Balibo na’in-240, Bobonaro na’in-440, Atabae na’in-150 no Lolotoe na’in-150.
Jornalista : Sérgio da Cruz
Editór : Evaristo Soares Martins
