TDD aplika prizaun preventiva ba arguidu komete omisídiu iha Liquiça

DILI, 11 abríl 2022 (TATOLI)— Tribunál Distritál Dili (TDD), segunda ne’e (11/04), halo prosesu julgamentu primeiru interrogatóriu hodi aplika medida koasaun prizaun preventiva ba arguidu AF, ne’ebé komete krime omisídiu simples hasoru vítima Edito Soares no Fernando dos Santos.
Tuir akuzasaun hosi Ministériu Públiku, katak kazu ne’e akontese iha suku Fahilebo, Postu Administrativu Bazartete, Munisipiu Liquiça, iha loron 7 abríl 2022, ne’ebé arguidu AF lori katana taa mate vítima na’in-rua ne’e bainhira partisipa atividade limpeza hodi simu illas São João Brinto atu halo vizita iha suku refere.
Notísia relevante: PNTL detein ona suspeitu taa mate ema nain-rua iha Liquiça
Motivu hosi kazu ne’e, bainhira suspeitu no vitima sira hala’o atividade limpeza, maibé mosu goja malu entre vítima ho suspeitu sira, nune’e suspeitu AF sente ofende hodi ka’er katana taa tiha vítima nain-rua no mate fatin.
Nune’e, Ministériu Públiku (MP) promove arguidu AF ho krime rua, mak hanesan omisídiu simples ne’ebé previstu iha artigu 138 hosi Kódigu Penál Timor-Leste no komete mós krime Arma Branka iha Lei númeru 5/2017.
Iha prosesu alegasaun finál, MP haree katak krime ne’ebé arguidu komete ne’e iha indísiu forte.
Tanba, iha sala julgamentu arguidu AF, hili direitu nonok, nune’e Tribunál mos intende katak faktu sira ne’e loos hotu.
Tribunál Distritál Dili (TDD) liuhosi juíza singular Ana Paula deside aplika medida koasaun prizaun Prevetiva hodi asegura arguidu iha prizaun laran.
Iha biban hanesan, Defesór Públiku ne’ebé fó asisténsia legal ba arguido, Esaqiu Gutteres, mós aseita medida koasaun prizaun preventiva.
Audénsia julgamentu ne’e, prezide hosi Juíza Singular, Ana Paula, Ministériu Públiku reprezenta hosi Prokuradór Napolião Soares da Silva no Arguidu hetan asisténsia legál hosi Defensór Públiku Estaqiu Guterres.
Notísia relevante: PNTL: ema ho defisiénsia mentál oho ema na’in-rua iha Liquiça
Jornalista: Natalino Costa
Editór : Florencio Miranda Ximenes

