OÉ-CUSSE, 12 abríl 2022 (TATOLI) –Servisu Departamentu Nasionál Transporte Terrestre (DNTT), Rejiaun Administrativa Espesiál Oé-Cusse Ambeno (RAEOA) hatama reseita ba kofre Estadu $14,983.00.
Reseita ne’ebé Servisu Departamentu Nasionál Transporte Terrestre (DNTT) RAEOA rekolla hahú hosi fulan-janeiru to’o marsu 2022.
“Durante tinan fiskál 2022 ne’e hahú janeiru to’o marsu, ita konsege hasai invoice hamutuk tahan 1.071 no rekolla osan hatama ba kofre Estadu hamutuk $14,983.00,” Xefe Departamentu DNTT RAEOA, Domingos de Almeida, informa ba Agência Tatoli iha Santa Rosa, Oé-Cusse, tersa ne’e.
Hosi montante ne’e iha fulan-janeiru totál invoice sai tahan 490 no rekolla osan hamutuk $6,471.50, iha fevereiru totál invoice sai tahan 360 ho reseita hamutuk $5,073.00, iha fulan marsu ne’e invoice sai tahan 221 ho totál osan hamutuk $3.439,00.
“Fonte orsamentu ne’e mai hosi atividade hafoun karta legál sira hanesan karta kondusaun, dokumentu inspesaun nomoos hafoun dokumentu transporte públiku, tantu mikrolete no angguna inklui ema sira-ne’ebé rejista motorizada ho karreta,” nia katak.
Tuir nia, iha situasaun pandemia komunidade ladún partisipa, maibé tama iha situasaun normál iha fulan tolu 2022 ne’e, iha partisipasaun aumenta no kooperasaun di’ak ho parte Polísia Unidade Tránzitu Oé-Cusse.
“Ita-nia serbisu ne’e iha kooperasaun di’ak ho tránzitu, kona-ba konsulta dokumentu ruma, tanba bainbain sira mak halo apreensaun identifika dokumentu ne’ebé mate entaun ho kritéria tenke hafoun dokumentu, ne’e kooperasaun parte DNTT ho tránzitu durante ne’e la’o di’ak,” nia afirma.
Jornalista : Abílio Elo Nini
Editór : Evaristo Soares Martins
