VIQUEQUE, 12 abril 2022 (TATOLI)—Kandidatu Prezidente Repúblika (PR) hosi Partidu Congresso Nacional de Reconstrução de Timor (CNRT) períodu 2022-2027, ho númeru sorteiu 01, José Ramos Horta la konsege realiza kampaña prezidensiál segunda volta iha munisípiu Viqueque tanba iha mudansa oráriu.
Tuir kalendáriu antes hosi Komisaun Nasionál Eleisaun (CNE, sigla portugés), ohin Horta realiza mini-kampaña iha Eskola Beloi ou kampu Futeból Viqueque iha tuku 08:30 to’o 17:30, maibé tanba iha mudansa, kampaña realiza meiu-dia ne’e iha Tasi-tolu, Dili.
“Ohin ami kansela atividade kampaña iha munisípiu Viqueque tanba iha mudansa oráriu iha nasionál. Tuir loloos ami realiza ohin iha Viqueque no aban mak ramata iha Dili, maibé mosu mudansa oráriu, ohin realiza fali iha Dili,” Koordenadór CNRT munisípiu Viqueque, Anacleto Freitas, informa ba Agência TATOLI iha sede CNRT Beloi, tersa ne’e.
Notísia relevante: Ramos Horta no Governu sei dezenvolve ekonomia interligada iha munisípiu tolu
Komisaun Polítika Nasionál (CPN, sigla portugés) CNRT orsida sei halo reuniaun iha sede Viqueque hodi kontinua halo atividade.
“Ami sei halo enkontru ho koordenadór movimentu, koordenadór postu partidu CNRT iha postu lima, inklui partidu sira ne’ebé apoiu ba kandidatu Ramos Horta, hodi fó orientasaun polítika halo door to door no mini-kampaña ba simpatizante sira,” nia subliña.
Ba kestaun ne’e, Koordenadór admite koordenasaun entre partidu CNRT no CNE la’o di’ak no bainhira iha mundansa ba kampaña sempre informa ba malu.
“Ami-nia kolaborasaun ho CNE la’o di’ak. Ohin mós ekipa CNE munisípiu Viqueque mai iha sede CNRT no ami informa ba sira katak atividade kampaña iha mudansa,” nia tenik.
Jornalista : Vitorino Lopes da Costa
Editora : Julia Chatarina
