DILI, 12 abríl 2022 (TATOLI)— Diresaun Nasionál Saúde Públika liuliu Departamentu Vijilánsia Epidemolojia iha Ministériu Saúde, hahú fulan-janeiru to’o horisheik, rejista pasiente dengue hamutuk 4.148, hosi númeru ne’e labarik na’in-50 mak mate.
“Situasaun kazu dengue iha Timor-Leste hosi janeiru mai too horiseik hamutuk kazu 4.148 no kumulativu óbitu na’in 50,” refere nota ne’ebé Agência TATOLI asesu, tersa ne’e.
Maioria kazu ne’e deteta husi Munisípiu Dili ho totál 2.782, Baucau 251, Manatuto 172, Covalima 135, Ermera ho kazu 118, Manufahi 167,Viqueque 69, Ainaro 45, Liquiça 112, Aileu 87 , obonaro 52, Lautem 153, no RAEOA lima.
Munisípiu Dili nafatin rejista kazu ne’ebe a’as iha primeira semana too ohin iha fulan ne’e ho totál kazu 2.782, kompostu hosi postu administrativu Dom Alexo iha kazu 1.615, Cristo-Rei 451, Vera-Cruz 298 no Nain Feto 358.
Enkunatu, Fasilidade saúde iha munisípiu Dili hanesan Hospitál Nasionál Guido Valadares (HNGV) rejista kazu hamutuk 480, Klínika Fatumeta 261, sentru saúde Comoro 998, sentru saúde Vera-Cruz 204, sentru saúde Formoza 483, sentru saúde Becora 242, klínika Madre Eliza na’in-ida, sentru saúde Atauro 11, sentru saúde Metinaro 40, klínika Bairru-Pité 59, klínika Motael na’in-rua no klínika Moris Foun na’in-ida.
Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.
MS apela ba populasaun
Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.
Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.
Notísia relevante: MS ho Menzie School no WMP diskute prevensaun dengue iha Timor-Leste
Jornalista : Felicidade Ximenes
Editór : Florencio Miranda Ximenes
