BAUCAU, 13 abríl 2022 (TATOLI) – Komandu Polísia Nasionál Timor-Leste (PNTL) munisípiu Baucau, preparadu asegura seguransa iha prosesu realizasaun eleisaun prezidensiál volta daruak iha loron 19 abríl.
Komandante PNTL Munisípiu Baucau, Superintendente António de Sá, hateten parte seguransa kompostu komandu ho Task Force, kuarta ne’e, akompaña Sekretariadu Tékniku Administrasaun Eleitóral (STAE) no Komisaun Nasionál Eleisaun (CNE, sigla portugés) Baucau ba nasionál simu materiál eleisaun hodi fó seguransa tuir dalan to’o mai Baucau ho kondisaun di’ak.
“Ita-nia planu feitu ona atu kontinua nafatin asegura eleisaun prezdensiál volta daruak iha ambiente kalma no hakmatek,” Komandante PNTL Baucau hateten iha Vila Nova, kuarta ne’e.
PNTL Baucau sei destaka membru na’in-neen iha salaun apuramentu STAE Baucau hodi fó seguransa durante prosesu verifikasaun no pakotementu to’o distribusaun materiál eleisaun ba sentru votasaun 125.
PNTL kontinua koordena ho entidade hotu hanesan ekipa susesu hosi kandidatu Prezidente Repúblika José Ramos Horta no Francisco Guterres ‘Lú Olo’ no autoridade munisípiu nune’e bele kria pás no estabilidade antes realiza eleisaun to’o distribui rezultadu apuramentu munisípiu ba nasionál.
“Sira-nia misaun ne’e to’o loron 19 abríl loron votasaun remata depois sei akonpaña materiál sira ba kapitál Dili,” Superintendente António de Sá akresenta.
Komandu Baucau hetan apoia tán membru PNTL hosi nasionál hamutuk na’in-30 ne’ebé tuir planu sei dezloka ba sentru votasaun sira iha postu admistrativu neen iha munisípiu Baucau.
Jornalista : Natalino Belo
Editór : Evaristo Soares Martins
