BAUCAU, ELEISAUN, HEADLINE, MUNISÍPIU, POLÍTIKA

STAE Baucau simu ona materiál eleisaun prezidensiál volta daruak

STAE Baucau simu ona materiál eleisaun prezidensiál volta daruak

Funsionáriu sira inklui tékniku STAE hatún materiál elisaun prezidensiál iha salaun apuramentu Vila Nova, kuarta (13/04). Imajen TATOLI/Natalino Belo.

BAUCAU, 13 abríl 2022 (TATOLI) –  Sekretariadu Tékniku Administrasaun Eleitorál (STAE) Munisípiu Baucau, kuarta ne’e simu ona materiál sensitivu no la’ós-sensitivu eleisaun prezidensiál volta daruak nian.

STAE Baucau simu hosi nasionál kompostu hosi materiál sensitivu hanesan buletin votu hamutuk kaixa 20 ho totál buletin votu hamutuk 108.750 no tótal livru 2.175.

“Ita foin transporta hosi STAE nasionál mai atu halo verifikasaun loron dahuluk hafoin halo pakotementu antes halo distribuisaun,” Diretór STAE Baucau, Lúcio Freitas Salvador, ko’alia iha Vila Nova, kuarta ne’e.

Enkuantu materiál naun-sensitivu kompostu hosi máskara, hand sanitizer, kabina votu hamutuk 50, banner ne’ebé taka kedas ho kandidatu prezidente repúblika na’in-rua nia fotografia, akta rezultadu eleisaun, formuláriu reklamasaun, fita liña, stabile, stop map no materiál seluk.

STAE Baucau sei halo verifikasaun materiál eleisaun prezidensiál iha loron kinta, 13 abríl no kontinua kedas halo pakotementu ne’ebé tuir planu sei distribui ba sentru votasaun hamutuk 125 no estasaun votu 150 iha loron 18 abríl.

“Antes ne’e totál buletin votu hamutuk 108.700 maibé agora aumenta tán buletin 50 atu evita karik mosu buletin votu ne’ebé laiha kualidade,” Lúcio akresenta.

Lúcio esplika, buletin votu aumenta 10% nune’e totál buletin votu iha Baucau hamutuk 108.750 hosi tótal votante 96.207 inklui votante iha ospitál hamutuk 393 kompostu hosi pasiente no profisionál saúde sira.

Diretór Komisaun Nasionál Eleisaun (CNE, sigla portugés) Munisípiu Baucau, Esmeraldo Damião Belo, konsidera materiál eleisaun prezidensiál iha STAE Baucau hotu-hotu sensitivu nune’e CNE hamutuk ho STAE inklui Polísia Nasionál Timor-Leste (PNTL) iha papél informa ba fiskál hosi kandidatu na’in-rua atu inklui iha prosesu pakotementu.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!