BOBONARO, 12 abríl 2022 (TATOLI) – Sekretariadu Tékniku Administrasaun Eleitorál (STAE) Munisípiu Bobonaro besik konklui ona edukasaun votante ba eleitór sira iha munisipiu ne’e hodi evita votu nulu iha eleisaun prezidensíal volta daruak ba períodu 2022-2027.
Diretór STAE Munisípiu Bobonaro, Mariano Viegas Amaral, informa atividade edukasaun votante ne’e hahú kedas iha loron 02 fulan-abríl konsentra liu ba iha sentru votasaun ne’ebé mak identifikadu númeru votu nulu barakliu iha eleisaun volta dahuluk.
“Ami hahú tiha ona iha postu Atabae, Balibo Maliana remata ona, depois iha postu Bobonaro sentru votasaun Uudu-ai karabau no Oe-leu mós hotu ona, kontinua hela iha postu administrativu Lolotoe no Cailaco kuaze besik konklui ona,” nia informa ba jornalista sira, iha Maliana, kinta ne’e.
Eleisaun volta dahuluk STAE identifika votu nulu iha munisípiu Bobonaro hamutuk 1,133 (2,09%). Hosi númeru ne’e bazea ba realtóriu maioria eleitór sira-ne’e la’ós ema analfabetu mak komete, maibé barakliu mai hosi eleitór sira-ne’ebé iha koñesimentu kle’an.
“Ha’u fó ezemplu, balun vota vistu ka fó marka tiha depois balu hakerek tán naran, tuir lei ne’e kuandu ita hakerek ona naran no halo dezeñu ruma iha kandidatu sira-nia fatin mamuk ne’e konsidera votu nulu ona, ne’ebé ami (órgaun eleitorál) konsidera ema sira matenek mak halo votu nulu barakliu,” nia esklarese.
Ho problema ne’e mak STAE kontinua esforsu realiza edukasaun votante ba eleitór sira maneira vota loloos iha eleisaun nune’e evita votu nulu.
Munisípiu Bobonaro iha sentru votasaun 130 no estasaun votu 150. Hosi númeru ne’e kompostu hosi postu administrativu Atabae iha sentru votasaun 13 no estasaun votu 15, Balibo sentru votasaun 20 no estasaun votu 24.
Iha postu administrativu Bobonaro iha sentru votasaun 40 no estasaun votu 44, Cailaco iha sentru votasaun 15 no estasaun votu 16, Lolotoe iha sentru votasaun 15 no estasaun votu 15 no postu administrativu Maliana iha sentru votasaun 28 no estasaun votu 36.
Jornalista : Sérgio da Cruz
Editór : Evaristo SoaresMartins
