iklan

BAUCAU, ELEISAUN, HEADLINE, MUNISÍPIU, POLÍTIKA

STAE Baucau distribui urna 300 ba sentru votasaun

STAE Baucau distribui urna 300 ba sentru votasaun

STAE Munisípiu Baucau distribui materiál eleisaun prezidensiál volta daruak ba sentru votasaun no estasaun votu sira iha territóriu Baucau. Imajen Tatoli/Natalino Belo.

BAUCAU, 18 abríl 2022 (TATOLI) – Sekretariadu Tékniku Administrasaun Eleitóral (STAE) segunda ne’e, distribui ona totál urna 300 inklui materiál eleisaun prezidensiál seluk ba sentru votasaun sira iha munisípiu Baucau.

Diretór STAE Baucau, Lúcio Freitas Salvador hateten ba brigadista sira atu serbisu tuir lema katak demokrasia, imparsialidade, neutru no transparánsia nune’e fó susesu ba eleisaun prezidensiál volta daruak iha tinan ne’e.

“Kada sentru votasaun ita iha urna rua tanba ita iha 150 estasaun votu nune’e multiplika ba rua entaun ita distribui 300 urna,” Diretór STAE Baucau ko’alia iha Vila Nova, segunda ne’e.

Materiál sensitivu ne’ebé distribui hetan asisténsia seguransa hosi membru Polísia Nasionál Timor-Leste no tuir lei eleitóral sei asegura iha sentru votasaun antes oras 06:00 dadeer entrega ba brigadista no ofisiál eleitorál sira atu hahú abertura eleisaun iha loron votasaun 19 abríl.

Nune’e mós prepara kapa hamutuk 125 hodi asegura urna durante viajen ba no fila hosi sentru votasaun sira.

Lúcio apela ba brigadista ne’ebé iha tempu votasaun prezidente sentru votasaun atu forte foti desizaun no fó orden ba seguransa sira ho klaru tuir lei eleitorál.

“Brigadista sira foti desizaun labele ta’uk no dúvida, desizaun hotu ha’u sei asegura iha munisípiu, atu ba ne’ebé de’it nu’udar resposavél másimu órgaun eleitorál iha munisípiu, ha’u iha sira-nia kotuk, sei la husik atu la’o mesak,” Lúcio enkoraja.

STAE Baucau hato’o mesajen ba fiskál hosi kandidatura na’in-rua atu kolabora liuliu asina akta rezultadu kontajen votu iha kada sentru votasaun atu nune’e iha tékniku STAE entrega direitu rezultadu iha sentru votasaun ba fiskál sira.

STAE Baucau utiliza transporte hamutuk 40-resin kompostu hosi aluga karreta 13, hosi patrimonio estadu sia no hosi servisu munisipál liña ministeriál iha Baucau 20-resin.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!