OÉ-CUSSE, 18 abríl 2022 (TATOLI) – Sekretariadu Téknika Administrasaun Eleitorál (STAE) hamutuk ho Komisaun Nasionál Eleisaun (CNE, sigla portugés) segunda ne’e distribui ona materiál eleisaun prezidensiál volta daruak ba sentru votasaun 60 no estasaun votu 88 iha Rejiaun Administrativa Espesiál Oé-Cusse Ambeno (RAEOA).
“Ohin, ita hamutuk iha ne’e sai sasin atu distribui materiál sensitivu no la’ós-sensitivu ba sentru votasaun 60 no estasaun votu 88 iha suku 18 no sub-rejiaun haat iha teritóriu Oé-Cusse, hodi prepara hala’o eleisaun segunda volta iha tersa 19 abríl,” Diretora STAE RAEOA, Luiza da Costa, ko’alia iha serimónia distribuisaun iha salaun Alfándega, Palaban, Oé-Cusse.
Nia garante laiha dúvida tanba iha seguransa hosi Polísia Nasionál Timor-Leste (PNTL) no observa hosi CNE no akompaña direta hosi fiskál kandidatura atu asegura to’o iha sentru votasaun ho seguru no transparánsia.
Diretór CNE Nasionál, Adão Soares, husu órgaun sira iha baze tenke serbisu ho responsabilidade, tanba bazea ba rezultadu avalisaun iha volta dahuluk, só autoriza de’it ema-ne’ebé iha karta autorizasaun hosi STAE, atu asesu iha sentru votasaun laran.
“CNE ho STAE serbisu tenke imparsiál, iha sentru votasaun ita tenke hatudu profisionál no imparsiál, ida-ne’e responsabilidade idak-idak, tanba agora situasaun polítika influénsia ita-boot sira, ha’u lakohi orsida veneno ne’e tama to’o ita-boot sira, sé mak asesu iha votasaun laran tenke hatudu kartaun autorizasaun hosi STAE, nune’e serbisu bele la’o ho seguru,” nia katak.
Nia husu ba fiskál kandidatu na’in-rua marka prezenza iha sentru votasaun dezde inísiu to’o apuramentu hosi sentru votasaun mai to’o apuramentu munisipál, nune’e bele mantein koordenasaun atu garante transparánsia iha prosesu tomak.
Komandante PNTL RAEOA, Superintendente Xefe, Mateus Mendes Assunção, garante eleisaun sei la’o ho hakmatek iha territóriu enklave ne’e.
“Ami prontu atu asegura eventu nasioná ne’e hosi prosesu tomak no garante situasaun hakmatek, pás no estabilidade iha rejiaun ne’e, tanba iha volta dauluk ita hala’o ona, no ohin to’o bairru iha tama fali ba volta daruak, ne’ebé ami asegura Oé-Cusse iha oras 24 nia laran, hodi fó espasu ba eleitór sira ezerse diretu votu no livre no hakmatek,” nia promete.
Komandu PNTL rejiaun Oé-Cusse, dezloka nia membru efeitivu atu atu asegura eleisaun prezidensiál volta daruak hamutuk na’in-172 komposta hosi PNTL na’in-137 no apoia hosi Polísia Unidade Fronteira (UPF) hamutuk 35.
Reprezentante Prezidente Autoridade RAEOA atuál Sekretáriu Rejionál ba Asuntu Administrasaun, Martinho Abani Elu, kongratula órgaun eleitorál no seguransa tanba iha eleisaun volta dahuluk, Oé-Cusse la’o ho susesu.
“Iha volta dahuluk, autoridade apoia transporta tuir kbiit ne’ebé iha hamutuk 24, maibé tanba distÁnsia no situasaun udan, agora aumenta ba 34, ne’e atu apoia ita-nia eleisaun ne’e la’o di’ak iha Oé-Cusse, tanba entre kandidatu rua ne’e, ida manán sai aman ba povu Timor-Leste, ha’u agradese tanba iha eleisaun uluk situsaun la’o di’ak, ha’u husu ita tenke mantein ida-ne’e, nune’e Oé-Cusse bele sai ezemplu ba munisípiu seluk,” nia orgullu.
Entretantu, totál transporte ne’ebé atu transporta materiál eleisaun ba sentru votasaun 60 no estasaun votu 88 hamutuk karreta 44, komposta hosi aluga 10 no apoia hosi Governu autoridade RAEOA hamutuk 34.
Nune’e mós, totál eleitór ne’ebé sei partisipa iha eleisaun prezidensiál 19 abríl 2022, iha RAEOA hamutuk 51.495 komposta hosi mane 26.232, feto 25.263, ho totál brigadista na’in-60 no ofisiál eleitorál na’in-880.
Jornalista : Abílio Elo Nini
Editór : Evaristo Soares Martins
