BOBONARO, 19 abríl 2022 (TATOLI) – Sekretariadu Tékniku Administrasaun Eleitorál (STAE) Munisípiu Bobonaro hahú hala’o apuramentu munisipál, kuarta ne’e iha oras 21: 00 hafoin akta hosi sentru votasaun hamutuk 130 no estasaun votu 150 tama iha salaun apuramentu.
Diretór STAE Bobonaro, Mariano Viegas Amaral, hateten, tuir loloos prosesu apuramentu munisipál hahú sedu maibé la’o atrazu oituan tanba iha tuku 19:00 kalan eletrisidade iha kapitál Maliana mate kauze menutu 20.
“Ami hakarak informa deit katak atividade apuramentu munisipál ne’e hatuur iha dekretu governu artigu 2 númeru númeru 7 katak prosesu eleisaun, apuramentu munisipiu tenke liuhosi dekretu ida- ne’e hó nune’e kuandu akta lima tama ita hahú ona, maibé ohin atrazu oituan,” nia hateten iha salaun apuramentu.
Prosesu apuramentu kompostu hosi prezidente meza lideradu hosi Diretór STAE, superviziona hosi Komisaun Nasionál Eleisaun (CNE, sigla Portugés) Domingos Soares, Diretór CNE munisípiu Bobonaro Juvito Ramos, envolve mós fiskál hosi kandidatu na’in-rua, observadór nasionál no internasionál no hetan seguransa hosi Polisía Nasionál Timor-Leste komandu munisípiu Bobonaro.
Totál akta ne’e ekipa hahú halo apuramentu hamutuk tolu, kompostu hosi sentru votasaun Pipgalak, sentru votasaun sede suku Manapa no sentru votasaun sede aldeia Meligu.
Tabulasaun apuramentu munisipál Bobonaro kandidatu Prezidente Repúblika númeru sorteiu 1, José Manuel Ramos Horta lidera ho votu 689 reprezenta 64,27% no kandidatu numeru sorteiu (2) Francisco Guterres ‘Lú Olo’ okupa segundu lugár ho votu 383 reprezenta 35,73% hosi totál eleitór 1.072.
Jornalista : Sergio da Cruz
Editór : Evaristo Soares Martins
