Xefe suku Bidau Lecidere husu komunidade labele lakon direitu votu
DILI, 19 abril 2022 (TATOLI)—Xefe suku Bidau Lecidere, postu administrativu Na’in-Feto, munisípiu Dili, Luís Pereira, husu ba komunidade atu uza direitu votu ho di’ak iha eleisaun prezidensiál segunda volta.
“Ha’u husu ba komunidade Bidau Lecidere hotu partisipa vota hodi hili ita-nia Prezidente Repúblika tuir konsiénsia hanesan sidadaun. Ohin ha’u ezerse ona ha’u-nia direitu no sente kontente tanba ita vota tuir konsénsia no laiha obrigatóriu, ida-ne’e mak ita-nia direitu nu’udar sidadaun, ita labele ko’alia de’it maibé tenke ezerse ita-nia votu,” Autoridade suku hateten iha sede suku Bidau Lecidre, tersa ne’e.
Notísia relevante: Dom Virgílio deseja eleisaun prezidensiál segunda ronda sei la’o di’ak
Tuir nia, eleitór hosi suku Bidau Lecidere ne’ebé ohin atu ezerse sira-nia direitu ba eleisaun Prezidensiál ne’e hamutuk 1.527.
Iha eleisaun primeira volta, iha eleitór hamutuk 200 iha suku ne’e mak la vota ho razaun serbisu iha rai-li’ur.
Suku Bidau Lecidere ho totál uma-kain 322, ho populasaun hahú hosi tinan zero to’o terseira idade hamutuk 1.424.
Tuir observasaun Agência TATOLI iha terrenu nota katak eleitór sira hahú forma hosi tuku 06:30 no tuku 07:00 hahú ezerse sira-nia direitu votu, ne’ebé situasaun la’o di’ak tanba hetan kontrolu hosi entidade relevante inklui Polísia Nasionál Timor-Leste (PNTL).
Jornalista : Arminda Fonseca
Editora : Julia Chatarina
