ERMERA, 20 april 2022 (TATOLI)-Eleisaun volta dahuluk (19/03) no daruak (19/04) ba eleisaun prezidensiál, la rejistu kazu ruma iha suku Ponilala, postu administrativu Ermera, munsípiu Ermera, tanba ne’e autoridade sira iha suku ne’e kontente ho atitude komunidade nian.
Xefe Suku Ponilala, Amaro Silverio dos Santos hateten komunidade suku Ponilala tuir eleisaun ho hakmatek. “Iha segundu ronde ne’e, ema 56 mak la tuir eleisaun, maibé situsaun la’o hakmatek no laiha provokasaun ruma, no laiha ema ida mak hemu tua lanu,” autoridade lokál ne’e relata.
“Hanesan autoridade lokál ami sente kontente ho konsiénsia komunidade nian iha suku ida ne’e tanba husi votasaun to kontazen votu laiha problema,” nia dehan.
Iha fatin hanesan, ofisiál polísia suku Ponilala, Herculano Soares Trindade relata katak situasaun jerál durante eleisaun prezidensiál segundu volta iha suku Ponilala la’o hakmatek no kontazen votu mós la’o ho di’ak tebes.
“Ita iha kooperasaun di’ak ho komunidade sira durante eleisaun ida ne’e, nune’e situasaun la’o normál no trankuilu,” Trindade rekoñese.
Relasiona ho rezultadu eleisaun, Kandidatu Prezidente Repúblika, José Ramos Horta hetan votu 1.155 hodi manan iha eleisaun segundu volta iha suku Ponilala, postu administrativu Ermera, munsipiu Ermera. Enkuantu, Kandidatu Prezidente Francisco Gutteres ‘Lú Olo’ hetan votu hamutuk 998.
Iha primeria volta, Horta manan maioria ho votu 1.000 iha Ponilala, no Lú Olo okupa fatin daruak ho totál votu 646. Husi ne’e hatudu katak, kandidatu prezidente ho sorteiu númeru ida (1) hetan tan votu 155 iha segundu volta no kandidatu ho númeru sorteiu rua (2) mós hetan tan votu 352 iha sgunda volta.
Tuir dadus ofisiál STAE, eleitor hamutuk 2.834 mak rezistradu iha suku Ponilala. Husi votante sira ne’e, 2.168 mak partisipa iha Eleisaun Prezidensiál segunda volta, no na’in 666 mak la tuir votasaun. Enkuantu iha primeira volta, votante hamutuk 2.225 mak tuir eleisaun. Husi ne’e hatudu katak votante 56 mak la tuir eleisaun iha segundu volta.
Iha suku Ponilala, STAE rejista votu nulu hamutuk 12 no votu reklamadu tolu.
Entretantu, suku Ponilala iha aldeia lima mak hanesan Kota Heu, Eroho, Hatuposi, Nunupu, Sakoko.
Related news:Suku Lauana, Ramos Horta hetan votu maioria
Jornalista: Filomeno Martins
Editór: Rafy Belo
