BOBONARO, ELEISAUN, HEADLINE, IMAJEN, MUNISÍPIU, POLÍTIKA, SEGURANSA

EDTL Bobonaro klarifika ahi mate derrepente iha momentu prosesu kontajen votu

EDTL Bobonaro klarifika ahi mate derrepente iha momentu prosesu kontajen votu

Supervizór EDTL Munisípiu Bobonaro, Mário de Jesus. Imajen Tatoli/Sérgio da Cruz.

BOBONARO, 20 abríl 2022 (TATOLI) – Supervizór Eletrisidade Timor-Leste, Empreza Públika (EDTL, E.P) Munisípiu Bobonaro, Mario de Jesus klarifika ahi mate derrepente tanba kabu média-tensaun iha área fider II, parte suku Odomau nian monu.

Nia esklarese, iha loron-tersa, tuku 20:00 kalan akontese dezastre naturál rezulta travesa ho ninia interiór dezde tempu Indonézia nian entaun anin hú tohar kedas rezulta kabu média-tensaun iha área fider II, parte suku Odomau nian monu ba rai, ikus mai ahi mate hotu iha kapitál Maliana kuaze menutu 30 nia laran.

Responsável EDTL Munisípiu Bobonaro ne’e klarifika asuntu ne’e relasiona ho informasaun ne’ebé espalla iha mídia sosiál katak EDTL, E.P Bobonaro nakonu ho interese polítiku maka hakarak fó oportunidade ba grupu partidu polítiku balu halo manipulasaun dadus hodi hamate eletrisidade durante prosesu kontajen votu.

“Ami EDTL la hanoin polítika hanesan ne’e durante serbisu, tanba hanesan empreza públika ami sei la haree kór (A) ka kór (B), ne’ebé informasaun sira-ne’e laloos tanba ema-nia interese, maibé ami klarifika katak ahi ne’e mate tanba avaria duni,” nia informa Agência Tatoli, iha kna’ar fatin, kuarta ne’e.

Nia dehan, maske avaria iha fatin balun, maibé hanesan superiór orienta tékniku sira kontrola másimu iha terrenu hodi garante fornesimentu elétrika lakan durante 24 oras nune’e prosesu apuramentu munisipál bele la’o ho susesu.

Diretór ne’e mós lori ekipa tomak husu deskulpa ba kliente sira iha kapitál Maliana, liuliu ekipa susesu kandidatu Prezidente Repúblika númeru sorteiu (1) iha munisípiu Bobonaro ne’ebé mak krítika hasoru EDTL realasiona ho avaria ne’e.

“Ami garante katak ba oin ahi sei la mate, kuandu la akontese anin no udan-boot, maibé kuandu akontese avaria iha fatin ruma, importante liu mak tenke imforma lalais atu ami halo intervensaun, tanba ami atu deteta avaria ne’e uza sistema manuál de’it,” nia esklarese

Daudaun ne’e totál tékniku ne’ebé hala’o serbisu iha terrenu hamutuk 20. Hosi númeru ne’e na’in-12 koloka iha kapitál Maliana no restante destaka iha postu administrativu Atabae, Balibo, Cailaco, Bobonaro no postu administrativu Lolotoe.

Diretór EDTL Munisípiu Bobonaro ko’alia asuntu ne’e hodi responde ba prosesu kontajen votu la’o hela sentru votasaun balun, derrepente ahi eletrisidade iha postu administrativu Maliana, munisípiu Bobonaro mate iha tuku 07:00 kalan.

Ho ahi mate derrepente ne’e halo ekipa susesu kandidatu Prezidente Repúblika númeru sorteiu (1) halo asaun greve iha edifísiu Sekretariadu Tékniku Administrasaun Eleitorál (STAE) munisípiu ne’e.

“Ahi ne’e kalan-kalan la mate, agora mate fali ne’e tanba saida, ami preukupa tanba agora sentru votasaun balu hanesan  iha suku Raifun ho Ritabou iha hela prosesu kontajen dvotu, favór ida rezolve lalais, keta manipula fali,” Ekipa Susesu Kanidatu Númeru 1 iha Bobonaro, Acacio Gonçalves, krítika ho hikalar maka’as iha tersa kalan.

Relasiona ho problema ne’e, Diretór STAE Bobonaro, Mariano Viegas Amaral, orienta kedas ekipa sira hapara provizóriu prosesu kontajen votu sentru votasaun sira.

“Ita hotu hein de’it hosi sira EDTL, tanba sira maka hatene liu kona-ba ahi mate ne’e. Ami mós seidauk hatene loloos, maibé ita hein ahi lakan mak kontinua prosesu kontajen votu la’o fali,” nia katak.

Tuir obervensaun Agência Tatoli iha terrenu nota, hafoin dezintendimemtu ne’e lao durante menutu 10 resin, ekipa STAE no CNE konsege konvense ekipa susesu sira hodi hakalma situasaun to’o ikus ambiente iha edifísiu STAE Bobonaro kontroladu.

Jornalista   : Sérgio da Cruz

Editór         : Evaristo Soares Martins 

iklan
iklan

Leave a Reply

iklan
error: Content is protected !!