BAUCAU, 21 abríl 2022 (TATOLI) – Komandu Polísia Nasonál Timor-Leste (PNTL) Munisípiu Baucau, hala’o hela investigasaun ba suspeitu krime eleitóral na’in-rua ne’ebé daUdaun ne’e iha sela hodi kontinua ba tribunál.
PNTL Baucau detein suspeitu na’in-rua iha tempu fragante delitu tanba tenta hamosu perturbasaun hanesan kazu iha loron 18 FULAN-abríl autór na’in-ida ho kondisaun lanu tenta halo perturbasaun bainhira transportasaun materiál eleisaun ba iha sentru votasaun Uai-aca, suku Uaitame, postu administrativu Quelicai.
Suspeitu seluk, PNTL detein iha loron 19 fulan-abríl, tanba kondisaun lanu tenta hamosu perturbasaun iha sentru votasaun iha suku Maluru, postu administrativu Quelicai.
“Daudaun ne’e komandu munisípiu iha suspeitu na’in-rua mak detein ligadu ho kazu Quelicai nian, ne’e indikasaun ba krime eleitóral nian tanba iha natureza fragate delitu entaun ita kaptura iha sela, detein 72 oras nia laran depois sei lori ba tribunál prosesa tuir lei,” Komandante PNTL Baucau hateten iha Vila Nova, kinta ne’e.
Superintendente António de Sá argumenta sei fó-sai identidade pesoál suspeitu na’in-rua ba públiku bainhira konklui ona prosesu investigasaun nune’e públiku bele akompaña.
Komandu PNTL Baucau rejista insidente durante eleisaun prezidensiál volta daruak maibé parte seguransa asegura kedas tanba akontesimentu sira durante festa demokrasia iha Baucau eskala ki’ik.
Notisia relevante: STAE rejista krime eleitorál tolu iha Baucau
Jornalista : Natalino Belo
Editór : Evaristo Soares Martins
