Top

Santa Sé husu TL fó rekoñesimentu ba estatutu jurídiku Igreja Katóliku

Ministru Justisa, Tiago Amaral Sarmento, hala'o enkontru ho Reprezentante Santa Sé iha Timor-Leste, Monseñór Marco Sprizzi ho nia ekipa sira. Iha Salaun Enkontru Ministériu Justisa. Imajen Tatoli/Francisco Sony

DILI, 21 abríl 2022 (TATOLI)— Núnsiu Apostóliku  Santa Sé iha Timor-Leste, Monseñor Marco Sprizzi, kinta ne’e, hala’o sorumutu ho Ministru Justisa, Tiago Amaral Sarmento, hodi ko’alia kona-ba implementasaun akordu konkordata ne’ebé halo ona entre país rua atu fó rekoñesimentu estatutu jurídiku ba Igreja Katóliku.

Hafoin enkontru, Monseñor Marco Sprizzi, hateten reuniaun traballu ne’e ko’alia kona-bá implementasaun konkordata entre Timor-Leste ho  Santa Sé, iha 2015 no ratifika ona hosi Parlamentu Nasionál. Iha artigu 3 hosi konkordata sita kona-ba  instituisaun Igreja Katóliku tenke iha personalidade jurídika signifika iha kapasidade halo tuir aspetu jurídiku, la’ós de’it reprezenta ema ida, maibé reprezenta Igreja.

Reprezentante Santa Sé iha Timor-Leste, Monseñór Marco Sprizzi. Imajen Tatoli/Francisco Sony

“Hafoin tinan hitu  asina konkordata ne’e seidauk aplika artigu ida ne’e too agora, tanba ne’e atu rezolve problema ne’e tenke iha uluk rekoñesimentu hosi Estadu,” Menseñor Marco Sprizzi hateten hafoin ramata enkontru iha Gabinete Ministru Justisa-Caicoli, kinta ne’e.

Responde kestaun ne’e, Ministru Justisa, Tiago Amaral Sarmento, rekoñese katak iha artigu balun husi konkordata entre Santa Sé no Governu Timor-Leste seidauk implementa no presiza iha diskusaun tanba ejisténsia Igreja Katólika la’ós hanesan organizasaun.

Ministru Justisa, Tiago Amaral Sarmento. Imajen Tatoli/Francisco Sony

“Estadu iha dever atu fó rekoñesimentu ho estatutu jurídiku ba ejisténsia igreja katóliku liuliu Dioseze no Parókia sira iha Timor-Leste, nune’e presiza liuhosi prosesu fazeadamente,” Governante ne’e akresenta.

Ho akordu konkordata ne’e, Ministru ne’e dehan Governu Timor-Leste fó ona apoia finanseiru no apoia sosiál seluk, maibé seidauk fó rekoñesimentu jurídiku ba ejisténsia ba igreja katólika iha Timor-Leste.

Alende ne’e, Ministériu Justisa mós sei reprezenta Governu Timor-Leste hala’o akordu areendamentu rai no mobilidade tuir konkordata ne’ebé estabelese ona.

Jornalista: Natalino Costa   

Editór      : Florencio Miranda Ximenes

Publisidade

Leave a Reply

Latest Post

error: Content is protected !!