ELEISAUN, HEADLINE, NASIONÁL

Xanana Gusmão: “Vitória la’ós Horta nian maibé povu”

Xanana Gusmão: “Vitória la’ós Horta nian maibé povu”

Prezidente Repúblika eleitu períodu 2022-2027, José Ramos Horta, hamutuk ho Prezidente partidu CNRT, Xanana Gusmão, akompaña ho kuadru partidu halo konferénsia imprensa iha sede Kandidatu PR, iha Hudi-laran, kinta (21/04). Imajen TATOLI/António Daciparu

DILI, 21 abril 2022 (TATOLI)–Prezidente partidu Congresso Nacional de Reconstrução de Timor (CNRT), Xanana Gusmão, hateten, José Ramos Horta hetan votu maioria iha eleisaun prezidensiál tinan 2022 la’ós vitória ba nia maibé povu nian.

Prezidente partidu CNRT, Xanana Gusmão. Imajen TATOLI/António Daciparu

“Ita hotu fiar ho vitória ida-ne’e, hanesan povu-nia vitória la’ós Ramos Horta nia vitória, povu mak manán. Povu-nia desizaun mak prevalese hodi husu ba Ramos Horta katak hadi’a tiha Estadu Direitu Demokrátiku ne’ebé atu naksobu ne’e,” Xanana Gusmão, hateten liuhosi konferénsia imprensa iha sede Kandidatu Prezidente Repúblika, José Ramos Horta, Hudi-laran, kinta ne’e.

Líder karizmátiku ne’e orgullu ho tanba povu fó fiar ba Kandidatu Prezidente Repúblika ne’ebé nia ho nia partidu fó apoiu.

Prezidente Repúblika eleitu períodu 2022-2027, José Ramos Horta, hamutuk ho Prezidente partidu CNRT, Xanana Gusmão, inklui kuadru partidu halo konferénsia imprensa iha sede Kandidatu PR, iha Hudi-laran, kinta (21/04). Imajen TATOLI/António Daciparu

“Ha’u kontente la’ós tanba Ramos Horta manán, maibé ha’u kontente tanba povu deside Ramos Horta mak sai Prezidente períodu 2022-2027 no kontente liután tanba Prezidente eleitu dehan ita fó lisaun boot ida no misaun ne’e mak estabilidade, la’ós violénsia iha eleisaun,” nia akresenta.

Líder nasionál ne’e apresia ba maturidade povu mantein pás no estabilidade iha ámbitu eleisaun prezidensiál iha loron 19 abril 2022.

“Agradese ba povu tomak nia maturidade polítika, liliu joven sira. Baibain ita temi dehan imi joven mak sei sai futuru ba Timór, foin daudaun iha loron hirak ne’e joven timor-oan sira hatudu duni katak imi hadomi rai ida-ne’e, imi hadomi povu ida-ne’e, la book malu no la estraga malu,” Xanana dehan.

Notísia relevante: Ramos Horta lidera kontajen votu iha Covalima ho 68,89%

Biban ne’e, eis Primeiru-Ministru ne’e husu ba povu atu mantein pás no seguransa iha rai-laran.

“Hahú iha loron eleisaun la’o kapas ho estabilidade no pás ne’e bele kontinua nafatin hodi fó fatin ba dezenvolvimentu ita-nia rai, ho dezafiu barak tebes no dezafiu sira ne’e lasai todan bainhira iha domin no dame,” nia apresia.

Líder másima partidu CNRT ne’e agradese ba Prezidente Repúblika  eleitu, Ramos Horta, tanba iha vontade atu serví dala-ida tan iha ita-nia rain.

Iha fatin hanesan, Prezidente Repúblika períodu 2022-2027 eleitu, José Ramos Horta, agradese ba povu ne’ebé fó ona konfiansa.

Prezidente Repúblika eleitu períodu 2022-2027, José Ramos Horta. Imajen TATOLI/António Daciparu

“Agradese ba joven, ferik no katuas sira, ema rihun ba rihun, ne’ebé mak apoia ona ha’u hodi sai Prezidente Repúblika, agradese ba partidu polítiku inklui movimentu oioin ne’ebé mak fó ona konfiansa,” Horta tenik.

Tuir dadus apuramentu nasionál eleisaun prezidensiál segunda volta hosi Sekretariadu Tékniku Administrasaun Eleitorál (STAE) hatudu katak José Ramos Horta ho votu 397.145 (62,09%) no Francisco Guterres ‘Lú Olo’ ho votu 242.440 (37,91%).

Prezidente Repúblika eleitu períodu 2022-2027, José Ramos Horta, no Prezidente partidu CNRT, Xanana Gusmão. Imajen TATOLI/António Daciparu

Antes ne’e, iha loron 23 janeiru 2022, liuhosi konferénsia nasionál CNRT, konfrensista sira deside fó apoiu ba Horta kompete iha eleisaun prezidensiál tinan 2022, maski Horta rasik la’ós kuadru partidu.

Hafoin restaurasaun independénsia, José Ramos Horta eleitu nu’udar Prezidente Repúblika daruak ba períodu 2007-2012.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!