iklan

HEADLINE, SEGURANSA

MI husu públiku labele fiar informasaun falsu iha rede sosiál

MI husu públiku labele fiar informasaun falsu iha rede sosiál

Vise-Ministru Interiór, António Armindo. Imajen TATOLI/Francisco Sony

DILI, 22 abríl 2022 (TATOLI)- Vise Ministru Interiór, António Armindo, husu públiku labele fiar informasaun ne’ebé ema iresponsabilidade lansa iha rede sosiál katak nia-hetan orientasaun hosi ema balun atu orienta Polisia Nasionál Timor-Leste (PNTL), tiru mate líder nasionál hanesan Kay Rala Xanana Gusmão no José Ramos Horta.

“Ha’u hanoin informasaun ne’e laloos, nune’e husu públiku labele fiar tanba iha timór ne’e ita hatene ona ema gosta inventa informasaun,” Vise Ministru Interiór, hateten ba Jornalista sira iha nia kna’ar fatin Vila-Verde, sesta ne’e.

Tanba nia dehan, líder nasionál sira hanesan Xanana Gusmão, Ramos Horta, Taur Matan Ruak, Lere Anan Timur inklui sira seluk Estadu iha dever no obrigasaun  fó seguransa másimu atu ema labele halo buat ruma ba sira.

“Ha’u la fiar katak ema ida haruka ha’u halo ida ne’e. Ha’u atu deklara ba públiku katak ida ne’e lia falsu, ne’ebe hau husu ba públiku labele fiar informasaun sira iha rede sosiál ne’e,’’ Governante ne’e rejeita.

Governante ne’e halo ona karta ba Polísia Siéntifika Investigasaun Kriminál (PCIC, sigla portugés) atu buka tuir ID facebok sira ne’ebé gosta fahe informasaun falsu iha rede sosiál.

“Ha’u haruka ona PCIC atu buka tuir ema iresposabilidade ne’e tanba lansa informsaun falsu ho intesaun hakarak kria instabilidade iha Timor-Leste,” Vise MI afirma.

Governante ne’e mós fó ona orientasaun ba Komandu Jerál PNTL, Komisáriu Faustino da Costa hodi orienta membru PNTL halo seguransa rigór hodi garante sidadaun sira nian movimentu iha tempu kalan.

“Gravasaun sira ne’ebé maka virál loos iha loron rua liuba ita rona, ha’u orienta kedan Komandante Jerál PNTL atu monta seguransa iha fatin ne’ebé temi iha gravasaun ne’e,” nia akresenta.

PNTL mós kontinua halo ona pasa revista iha tempu kalan no loron hodi asegura seguransa no garante komunidade sira nia movimentu bele la’o ho livre.

Jornalista : Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!