BAUCAU, ELEISAUN, HEADLINE, JUSTISA, MUNISÍPIU

TDB aplika pena multa ba arguidu krime eleitorál

TDB aplika pena multa ba arguidu krime eleitorál

Edifísiu Tribunál Distritál Baucau. Imajen Tatoli/Natalino Belo.

BAUCAU, 22 abríl 2022 (TATOLI) – Tribunál Distritál Baucau (TDB) liuhosi julgamentu aplika pena multa ba arguidu na’in-rua ne’ebé komete krime aktu eleitorál iha suku Maluru, postu administrativu Quelicai.

Kazu refere rejista iha Tribunál Distritál Baucau ho númeru Nuc 0023/22.BCSIC, loron 21 abríl 2022 ho tipu krime perturbasaun ba aktu eleitorál ne’ebé previstu iha kódigu penál artigu 235 ne’ebé iha pontu dahuluk hateten sé mak liuhosi kualkér meiu asembleia votu nian, sei kondena ho pena prizaun to’o tinan ida ka multa.

Polísia Nasionál Timor-Leste (PNTL) Munisípiu Baucau detein arguidu na’in-rua inisiál AS no AMS iha tempu fragante delitu tanba ho kondisaun lanu tenta hamosu perturbasaun iha loron realizasaun eleisaun prezidensiál iha sentru votasaun suku Maluru, postu administrativu Quelicai.

“Ohin desizaun ona, iha desizaun ne’e Tribunál aplika pena multa ba arguidu na’in-rua hanesan multa loron-30 fixa kada loron-ida sentavu 0,50 hosi tótal multa $15 ba kada arguidu ho pena aternativa loron-20 prizaun,” Defensór Públiku Sidonio Manuel Sarmento hateten iha Vila Nova, sesta ne’e.

Prosesu julgamentu prezide hosi juis singulár José Escorial, Ministériu Públiku reprezenta hosi Prokuradór Júlio da Silva Correia no arguidu na’in-rua hetan asisténsia legál hosi Defensór Públiku Sidonio Manuel Sarmento.

Notísia relevante: PNTL Baucau sei prosesa autór krime eleitóral na’in-rua ba tribunál

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!