iklan

HEADLINE, SEGURANSA

PNTL detein ona suspeitu halo gravasaun ameasa asalta komunidade Manatuto-Lautém

PNTL detein ona suspeitu halo gravasaun ameasa asalta komunidade Manatuto-Lautém

Polísia Nasionál Serbisu Investigasaun Kiminál (PNSIK) hamutuk ho servisu sekretu PNTL nian detein ona suspeitu na’in-rua halo gravasaun ameasa hatauk sidadaun sira hodi asalta komunidade Manatuto no Lautém. Imajen Tatoli/Natalino Costa.

DILI, 23 abríl 2022 (TATOLI)—Polisia Nasional Timor-Leste (PNTL) liuhosi Polisia Nasionál Servisu Investigasaun Kriminál (PNSIK) hamutuk ho servisu sekretu sira, detein ona suspeitu na’in-rua ne’ebé mak sai hanesaun autór prinsipál halo gravasaun hodi ameasa halo asalta komunidade hosi Manatuto-Lautém ne’ebé hala’o movimentu kalan ba-mai Dili.

Portavós Komandu Jerál PNTL, Superientidente Xefe Armando Monteiro, hateten kazu gravasaun lian ne’ebé mak halo hosi grupu balun ne’ebé hakarak kria instabilidade atu asalta komunidade hosi munisípiu Manatuto no Lautém, bainhira halo viajen ho bus iha tempu kalan, hafoin kontajen votu ba rezultadu eleisaun prezidensial 19 abríl foin daudaun.

Polísia Nasionál Serbisu Investigasaun Kiminál (PNSIK) hamutuk ho servisu sekretu PNTL nian detein ona suspeitu na’in-rua halo gravasaun ameasa hatauk sidadaun sira hodi asalta komunidade Manatuto no Lautém. Imajen Tatoli/Natalino Costa.

“PNTL halo kedan operasaun ba ida-ne’e iha tempu kalan. Liuhosi operasaun sira-ne’e, ita-nia PNSIK hamutuk  ho servisu sekretu sira konsege detein suspeitu prinsipál na’in-rua ho inisiál PAM, idade (26) no ida seluk AM idade (40). Suspeitu prinsipál na’in-rua ne’e detein ohin dadeer tuku 08h00 iha aldeia Halidolar, suku Hera, postu Admistrativu Cristo Rei, munisípiu Dili. Agora daudaun suspeitu na’in-rua submete ona ba prosesu investigasaun iha PNSIK. Hafoin ida-ne’e ita sei halo detensaun ba sira,” Portavós Komandu Jerál PNTL, Superientidente Xefe Armando Monteiro, hateten liuhosi Konferénsia Imprensa ne’ebé mak halo iha Kuartel Jerál PNTL, Caicoli, sábadu ne’e.

Portavós PNTL ne’e afirma, aktu ne’ebe suspeitu na’in-rua halo ne’e ho grupu ne’ebé mak kompostu hosi ema na’in-hitu.

“Agora suspeitu prisipál na’in-rua mak ita kaer ona. Na’in-lima seluk, ita sei buka tuir hela no sei submete hotu ba prosesu investigasaun,” nia dehan.

Nia parte husu ba komunidade labele pániku ba kestaun sira-ne’e hodi kontinua depozita konfiansa tomak ba PNTL nu’udar instituisaun seguransa Estadu nian, bainhira buat ruma informa ba autoridade seguransa hodi bele halo atuasaun bainhira ema ruma halo movimentu krime hodi tenta kria instabilidade iha Timor-Leste.

“Husu ba komunidade kuandu iha grupu ruma mak halo movimentu kria krime hodi instabiliza situsaun, halo favór informa ba PNTL sei foti medida preventiva no represivu imediatu hodi nune’e komunidade moris livre iha pás no hakmatek nia laran,” nia dehan.

PNTL sei kontinua haforsa seguransa iha tempu kalan ba área sira-ne’ebé mak temi iha gravasaun ne’e nia laran.

Entretantu, hatán kona-ba prosesu legál ba Eis Sekretáriu Estadu Veteranu no Antigu Kombatente Libertasaun Nasionál, Gil da Costa “Oan Soru”, ne’ebé halo video hodi halo azitasaun iha rede sosiál hodi temi iha kilat ilegál espalla iha territoriu nasionál durante kampaña eleisaun prezidensiál, Armando Monteiro hateten, kona ba kestaun ne’e Komandante Jerál klarfika ona katak laiha kilat ilegál ne’ebé espalla iha territóriu nasionál.

Jornalista : Natalino Costa

Editór       : Cancio Ximenes

iklan
iklan

Leave a Reply

iklan
error: Content is protected !!