DILI, 23 abríl 2022 (TATOLI)—Portavós Komandu Jerál Polisia Nasional Timor-Leste (PNTL), Superintedente Xefe Armando Monteiro, hateten Komandu Jerál PNTL hala’o ona enkontru ho Ministeriu Administrasaun Estatál (MAE) ko’alia kona-ba preparasaun seguransa ba serimónia toma pose ba Prezidente Repúblika 2022-2027, José Ramos Horta.
Nia hatutan, PNTL sei halo seguransa másima ba serimónia toma pose ba Prezidente Repúblika eleitu iha komemorasaun loron nasionál Restaurasaun Independénsia ba dala-XX (20 maiu 2002-20 maiu 2022) ne’ebé sei realiza iha Tasi-Tolu, Dili.
“Reuniaun téknika entre komisaun organizadora Ministeriu Administrasaun Estatál (MAE) no PNTL ne’ebé partisipa hosi Komandu Operasaun Nasionál PNTL nian, daudaun ne’e la’o hela. Bainhira iha ona finalidade ba reuniaun refere, mak Komandu sei dezeña planu oinsá atu fó seguransa di’ak ba eventu rua hanesan serimonia toma pose ba Prezidente Republika eleitu períodu 2022-2027 no komemorasaun tinan XX restaurasaun Independensia iha 20 maiu,” Superintedente Xefe Armando Monteiro, hateten ba jornalista sira liuhosi Konferénsia Imprensa ne’ebé mak hala’o iha Kuartél Jerál PNTL, Caicoli, Dili, sábadu ne’e.
Hatán kona-ba seguransa ba konvidadu espasiál alta entidade nasaun seluk hanesan Prezidente Republik, Primeiru-Ministru no reprezentate nasaun li’ur-nian ne’e, parte Komandu Jerál PNTL sei elabora didi’ak kona-ba seguransa ba ida-ne’e.
“Teknikamente nasaun balun nia reprezentante iha Timor-Leste aprezenta ona katak sira-nia ema importante sei partisipa iha ita-nia serimonia importante rua ne’e. Tempu badak, ami sei elabora planu seguransa ba alta entidade sira-ne’e,” Superientidente Xefe ne’e hateten.
Jornalista : Natalino Costa
Editór : Cancio Ximenes
