DILI, 23 abríl 2022 (TATOLI)—Portavós Komandu Jerál Polisia Nasional Timor-Leste (PNTL), Superintedente Xefe Armando Monteiro, informa Polísia Nasionál Timor-Leste sei buka tuir autór ne’ebé lansa informasaun iha rede sosiál hodi kria instabilidade.
Notísia Relevante:
Nia hatutan, kestaun ne’e hatan ba informasaun ne’ebé espalla iha rede sosiál katak nia hetan orientasaun hosi Konsilleiru Superiór Partidu Kmanek Haburas Unidade Nasionál Timor Oan (KHUNTO), Jose dos Santos Naimori Bucar, hodi orienta membru polísia atu elemina líder nasionál balun iha Timor-Leste.
“Ami simu ona karta ida hosi Vise Ministru Interiór, António Armindo, atu buka tuir ema-ne’ebé hakarak soe informasaun falsa iha rede sosiál. Operasaun ne’e ezatamente tátika komandu nian, ami sei halo,” Superintedente Xefe Armando Monteiro hateten ba jornalista sira liuhosi Konferénsia Imprensa ne’ebé mak halo iha Kuartél Jerál PNTL, Caicoli, Dili, sábadu ne’e.
Nia dehan, informsaun sira hanesan ne’e parte PNTL simu durante eleisaun prezidensiál segunda volta ne’ebé realiza iha 19 abríl 2022 hodi hili Prezidente Repúblika períodu 2022-2027.
“Buat sira-ne’e mosu tanba de’it ita-nia maluk balun insatisfas ho rezultadu eleisaun, entaun sira lansa informasaun falsa hodi provoka sistuasaun, hodi hamosu instabilidade. Maibé ida-ne’e parte PNTL sei la nonook,” nia dehan.
Jornalista : Natalino Costa
Editór : Cancio Ximenes
