DILI, 24 abril 2022 (TATOLI)—Komisaun Nasionál Eleisaun (CNE, sigla portugés), domingu ne’e, konklui ona prosesu apuramentu nível nasionál hosi eleisaun prezidensiál segunda volta tinan 2022, hodi prepara ba elaborasaun akta molok submete ba Tribunál Rekursu (TR).
Prezidente CNE, José Agustinho da Costa Belo, informa durante prosesu apuramentu, ofisiál sira identifika votu branku, nulu, rejeitadu no abandonadu hamutuk 5.048, ne’ebé hafoin verifika ikus mai deside votu 1.200 sai válidu, nune’e kandidatu númeru sorteiu 01 hetan aumentu votu 800 no kandidatu númeru sorteiu 02 hetan 400.
“Hosi votu ne’ebé iha, kandidatu ho númeru sorteiu 01, José Ramos Horta antes ne’e ho votu 397.145 aumenta ba votu sai 398.082, nune’e mós ho kandidatu ho númeru sorteiu 02, Francisco Guterres ‘Lú Olo’ ne’ebé antes ne’e ho votus 242.440 amenta votu sai 242.939,” Prezidente CNE, relata ba jornalista hafoin enserra prosesu apuramentu nasionál iha salaun CNE, Colmera.
Notísia relevante: CNE halo ona apuramentu ba votu nulu rihun 5-resin
José Belo konsidera votu ida signifikante tebes, tanba ne’e presiza hadi’a bebeik, nune’e aban bain-rua eleitór sira bele iha responsabilidade no bainhira vota ho kalma no la’o tuir prosesu tomak atu votu nulu bele menus.
“Maski nune’e, situasaun ne’e konsidera di’ak tanba iha primeira volta iha votu nulu hamutuk 12.000 maibé iha segunda volta votu nulu iha de’it 5.000. Ne’e hanesan avansu ida ne’ebé órgaun eleitorál sei hadi’a bebeik,” nia akresenta.
Antes ne’e, Sekretariadu Tékniku Administrasaun Eleitorál (STAE) submete rezultadu apuramentu munisipál inklui estranjeiru iha loron 22 abril, hafoin CNE halo abertura apuramentu nasionál no verifika dadus hotu, liu-liu reklamadu no votu nulu.
“Ita haree kestaun numériku ne’ebé presiza verifika didi’ak, Ohin iha tempu oras 72, iha domingu ita konklui ona rezultadu tomak no aban ba oin ita elabora de’it akta durante oras 72,” José Belo esplika.
Aleinde ne’e, CNE fó tempu oras 24 ba reprezentante Kandidatu Prezidente Repúblika na’in-rua hodi halo reklamasaun.
“Karik iha kestaun ruma ou rekursu ruma ne’ebé presiza hato’o, CNE sei responde ida-ne’e, maibé karik laiha rekursu, CNE sei submete ba Tribunál Rekursu hodi analiza no valida rezultadu tomak, ikus mai sei anunsia ofisiálmente rezultadu eleisaun prezidensiál segunda volta tinan 2022,” nia tenik.
Iha rezultadu apuramentu provizóriu hosi sentru votasaun 1.200, totál eleitór 859.925, ema ne’ebé tuir vota 646.389, votu válidu 640.967 (99,16%), branku 1.643 (0,25%), nulu 3.734 (0,58%), rejeitadu 28 (0,00%), abandonadu 15, ne’ebé hosi rezultadu ne’e José Ramos Horta ho votu 398.028 (62,1%) no Francisco Guterres ‘Lú Olo’ ho votu 242.939 (37,9%).
Jornalista : Cidalia Fátima
Editora : Julia Chatarina
