OÉ-CUSSE, 25 abríl 2022 (TATOLI) – Autoridade suku Ban-Afi, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), segunda ne’e husu autór sunu uma Lucia Poto nia uma entrega-aan ba polísia.
Autoridade lokál suku suku Ban-Afi hamutuk eis koordenadór ekipa kandidatu José Ramos Horta ho ekipa kandidatu Francisco Guterres ‘Lú Olo’, husu ba autór hodi koopera ho parte PNTL atu responsabiliza aktu ne’e.
“Ami lamenta tebes ho insidente ne’ebé akontese, tanba akontese loos iha eleisaun prezidensiál, nune’e sai polémika boot iha públiku hodi provoka opiniaun ne’ebé nakonu ho linguajen insultu no ofensiva iha mídia sosiál, katak hahalok hanesan ema otonomista sira,” Portavós Paulo Timo, hatete liuhosi konferénsia imprensa iha aldeia Kuanobe, suku Ban-Afi, Oé-Cusse, segunda ne’e.
Tuir nia, komunidade iha suku Ban-Afi, sempre promove no tane aas nafatin valór demokrasia, nune’e kondena maka’as aktu ne’e.
“Ami husu ba autór atu ho voluntariamente entrega-aan ba polísia hodi submete ba investigasaun, karik oknum ka autór la koopera tuir pontu ne’ebe ami sita ona iha iha konferénsia ne’e, ami promete iha tempu badak, mak ami povu hosi aldeia kuanobe sei hamutuk ho lideransa komunitária konsellu suku, lia- na’in no koordenad’or hosi ekipa kandidatura na’in-rua sei entrega ba natureza foho lulik suku Ban-Afi mak deskobre tuir kbi’it natureza nian,” katak portavós ne’e.
“Liuhosi koferensia ne’e ami husu mós ba parte Polísia Nasionál Timor-Leste iha Oé-Cusse atu aselera prosesu investigasaun atu nune’e bele justifika ba públiku kauza hosi insidente ne’e,” konferénsia imprensa konjunta ne’e refere.
Partisipa iha konferénsia imprensa ne’e mai hosi xefe aldeia Kuanobe Jorge Lalus, xefe suku Ban-Afi José Seko, lia-na’in suku Ban-Afi Agustinho Feno, konsellu suku Ban-Afi Manuel Tout hamutuk ho koordenadór Partido CNRT,Marcos Ele, koordenadór Partidu FRETILIN Cipriano Colo no Ofisiál Polísia Suku (OPS) suku Ban-Afi Baptista Punef.
Notísia relevante: PNTL kontinua buka-tuir suspeitu sunu uma iha RAEOA
Jornalista : Abílio Elo Nini
Editór : Evaristo Soares Martins
