Estudante 25.451 iha RAEOA partisipa ezame trimestre dahuluk

OÉ-CUSSE, 25 abríl 2022 (TATOLI) – Estudante hamutuk na’in-25.451 iha Rejiaun Administrativa Espesiál Oé-Cusse Ambeno (RAEOA), segunda ne’e partisipa ezame trimestre dahuluk iha tinan letivu 2022.

“Ohin, Oé-Cusse realiza ezame primeiru períodu ba nível eskola hotu-hotu, ne’ebé loloos ita hala’o iha loron 18 abríl ne’e, maibé tanba iha órariu ba eleisaun prezidensiál, entaun Ministériu Edukasaun, Juventude no Desportu (MEJD) adia fali ba 25 abríl ne’e,” Diretór Edukasaun RAEOA, Daniel Maunu, hateten iha RAEOA, sábadu ne’e.

Tuir nia, ezame dahuluk ne’e ba nível hotu-hotu hahú hosi pré-eskolár, ensinu báziku hodi primeiru siklu klase 10 to’o 40, segundu siklu klase 50 to’o 60, no terseiru siklu klase 70 to’o 90 inklui eskola sekundáriu públiku privada no tékniku vokasionál ho totál estudante hamutuk 25.451 iha teritóriu Oé-Cusse.

Dirijente ne’e garante katak, realizaun ezame ne’e sei la’o ho susesu tanba antes ne’e parte edukasaun fornese ona apoia ekipamentu ba kada eskola sira.

“Ha’u fiar sei laiha prekupasaun liuliu ba preparasaun ezame ne’e, bainbain iha preokupasaun atu hola materiál preprasaun, maibé tanba antes ne’e ita fahe ona osan konsisaun entaun kada eskola jere rasik ba nesesidade ezame no eskola nian, tán ne’e to’o ohin laiha eskola ruma atu mai husu apoiu kona ba materiál ezame,” nia garante.

Totál Ensinu Báziku Filiál (EBF) hamutuk 71, Ensinu Báziku Sentrál (EBC, sigla portugés) hamutuk 20, Eskola Sekundáriu Jerál no privada hamutuk lima (5), Eskola Tékniku Vokasionál haat (4) no Pré-Eskolár 14.

Nune’e totál eskola públiku iha RAEOA hamutuk 102 no eskola privada 12 hamutuk 114, hodi envolve profesór hamutuk 816, komposta hosi permanente 446 no kontratadu hamutuk 415.

Jornalista   : Abílio Elo Nini
Editór         : Evaristo Soares Martins