iklan

HEADLINE, SEGURANSA

POLTRAZ Dili prende karreta 10 iha PN oin

POLTRAZ Dili prende karreta 10 iha PN oin

Karreta sira para hela iha Estasionamentu. Imajen/Osória Marques

DILI, 25 abríl 2022 (TATOLI)-Polisia Nasionál Timor-Leste (PNTL) liuhosi Unidade Tranzitu Munisípiu Dili, ohin, prende ona karreta 10 iha área Parlamentu Nasionál (PN) nia oin tanba viola lei kodiku estrada.

Komandante Tranzitu Munisípiu Dili, Inspetór Xefe, Domingos Gama ba jornalista sira iha área PN hateten tuir lei kodiku estrada artigu neen, pontu ida, no rua ne’ebé  koalia kona-ba estazionamentu, bainhira viola lei kodiku estrada hodi hamosu engrafamentu ba movimentu transporte tenke aplika multa.

“Ita halo apreensaun ba karreta privada sia inklui karreta Governu nian ida, tanba  para sala,  la’ós iha fatin estozionamentu, ne’ebé ita tau ona simbolu ne’e maibé para fali Parlamentu oin depois okupa fali espasu hodi difikulta movimentu transporte públiku ne’ebé hamosu engárafamentu,”nia dehan.

Atu responde ba preokupasaun públiku kona-ba mosu engrafamentu iha Dili iha oras dader no meudia, PNTL liuhosi Unidade Tranzitu Dili sei kontinua halo operasaun rutina ba transporte públiku sira bazeia ba orientasaun husi Komandante Jerál PNTL nian foinlalais ne’e.

“Operasaun ne’e ita halo rutina, maibe funsiunáriu sira mak viola uluk, ohin ita boot sira haree, karreta Governu ida,  tuir loloos ne’e sira ne’e sai ezemplu ba transporte públiku sira,” Domingos Gama hateten.

Komandante Tranzitu Munisípiu Dili ne’e apela ba públiku no motorista sira atu iha konsiénsia bainhira para karreta no motor sira tenke para iha fatin estazionamentu ne’ebé maka iha nune’e bele rezolve kestaun engrafamentu.

Entretantu, tuir observasaun Tatoli nian iha terrenu nota ekipa Polisia Tranzitu Munisípiu Dili lori kedas transporte hirak ne’e bá iha Komandu PNTL Dili hodi aplika multa.

Jornalista : Natalino Costa

Editór       : Agapito dos Santos

iklan
iklan

Leave a Reply

iklan
error: Content is protected !!