Ekipa saúde kontinua halo fumigasaun ba área risku iha munisípiu Dili

DILI, 26 abríl 2022 (TATOLI)—Diretóra Servisu Saúde Munisípiu Dili Agostinha Segurado hateten, ekipa saúde kontinua halo fumigasaun ba área risku sira hodi  kombate moras dengue iha munisípiu Dili.

“Fumigasaun  daudaun ne’e ita konsentra ba se  mak identifika moras sei direita ba halo intervensaun  hodi   rega susuk.  Maibé,  bainhira mak sira hetan ona fumigasaun  ekipa sira sei la ba. Maibé, sei  haruka ekipa  saúde   halo  esplikasaun no  edukasaun ba komunidade sira iha área risku  dengue,”  Diretora Servisu Saúde Munisípiu Dili Agostinha Segurado hateten ba jornalista sira iha nia kna’ar fatin, Bairro Formoza, Dili, ohin.

Nia hateten, iha aldeia ida la bele rega susuk dala tolu iha fulan ida nia laran, se lae   fó moras ba komunidade sira. “Aldeia ida la bele rega dala tolu iha fulan ida nia laran, se lae  sei fó impaktu moras  ba komunidade ka  labarik sira. Ho ida ne’e  mak presija haforsa fali edukasaun  saúde ne’ebé   mak ita iha ba komunidade sira,” nia informa.

Área ne’ebé risku  dengue iha  munisípiu Dili  aas liu mak postu Adminsitrativu Dom Aleixo, tuir  kedan Cristo Rei, Nain Feto, Vera Cruz, Atauro no Metinaro. Maibé, ekipa saúde nafatin halo intervensaun  tanba  ekipamentu  mediku abate no malation   sei sufisiente.

Parte seluk,  Diresaun Nasionál Saúde Públika liuliu Departamentu Vijilansia Epidemolojia  iha Ministériu Saúde, hahú fulan-janeiru   to’o horiseik  pasiente dengue sa’e ba 4.463. Hosi númeru ne’e na’in 50 mak mate.

“Situasaun kazu dengue iha Timor-Leste hosi janeiru mai too horiseik hamutuk kazu 4.463 no kumulativu óbitu na’in 50,” hakerek karta komunikadu  ne’ebé Agência TATOLI asesu ohin.

Maioria kazu ne’e deteta husi Munisípiu Dili ho totál 3.030, Baucau  296, Manatuto 173, Covalima 142, Ermera ho kazu 118, Manufahi 171,Viqueque 75, Ainaro 45, Liquiça 113, Aileu  87  no Bobonaro 54, Lautem 153, no RAEOA neen.

Munisípiu Dili nafatin rejista kazu ne’ebe a’as iha primeira semana desimu sexto fulan abril 2022, ho totál kazu  3.030 kazu.

To’o ohin loron iha desimu oitavu semana fulan abril 2022, kazu dengue  hosi  postu administrativu Dom Alexo iha  1.791, Cristo-Rei 472, Vera-Cruz 322, no Nain Feto 381.

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 516, Klínika Fatumeta 275, sentru saúde Comoro 1105, sentru saúde Vera-Cruz 226, sentru saúde Formoza 541, sentru saúde Becora 248, klinika madre eliza ida, sentru saúde Atauro  11,sentru saúde Metinaro 40 klínika Bairru-Pité 59  no klínika Motael na’in-rua klinika moris foun ida.

Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.

Apela mós Autoridade Munisipál no Autoridade Lokál atu bele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dala ida.

Hamo’os sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron no so’e lixu iha nia fatin.

Notísia relevante :   Prevene dengue: MS halo fumigasaun rutina iha kapitál Dili

Jornalista : Felicidade Ximenes

Editóra   : Armandina Moniz