DILI, 26 abríl 2022 (TATOLI)-Komandu Polisia Nasionál Timor-Leste, tersa ne’e, ensera ona programa formasaun banda múzika PNTL nian ba ema na’in 30 tanba partisipa ona formasaun durante fulan-fevereiru 2022 iha Sentru Formasaun Polisia (CFP,sigla portugés) Comoro Dili.
Iha serimonia enseramentu ne’e, Komandu PNTL distribui sertifikadu formasaun ba formandu sira inklui formadór sira husi Sentru Formasaun no Treinu F-FDTL Metinaro.
Segundu Komandante Polisia Nasionál Timor-Leste ( PNTL), Komisariu Mateus Fernandes, hateten formasaun ne’e realiza tanba iha kooperasaun servisu entre Komandu PNTL ho Sentru Formasaun Polisia Comoro no Sentru Formasaun no Treinu F-FDTL.
“Ha’u sente kontente tanba formasaun banda muzika ne’e ita nian instrutór sira hosi Sentru Formasaun no Treinu Metinaro F-FDTL nian ho sira-nia matenek no esperensia ne’ebé maka sira iha área banda muzika nian, bele hatutan ba membru PNTL no dadaun ne’e hatudu duni progresu, tanba iha aniversariu PNTL nian foin dadaun, maske membru PNTL foin aprende, maibé bele toka mesak ona no di’ak tebes,” Komisáriu ne’e hateten.
Instituisaun PNTL sei kontinua servisu hamutuk ho FALINTIL-Forsa Defeza Timor Leste hodi fó formasaun kona-ba banda múzika ba membru Polisia sira barak liután iha futuru.
Iha fatin hanesan, Komandante CFP, hateten planu hari’I banda múzika ba instituisaun PNTL ne’e hahú ínisia kedas iha tinan 2019 liubá maibe foin maka realiza iha tinan 2022.
“Iha 2019 ha’u rasik maka propoin ba Komandante Jerál PNTL sesante Julio da Costa Hornai katak, importante tebes iha PNTL tenke iha banda muzíka rasik, maibé momentu ne’ebá la konsege, no agora maka konsege ita realiza no ita envolve membru PNTL nain 30 ba atividade ne’e,” nia esplika.
Maske foin maka estabelese banda múzika ne’e, maibé nia urgullu tanba formandu sira hatudu ona atraksaun iha komemorasaun aniversáriu PNTL foinlalais ho susesu.
“Sira hatudu iha aniversariu PNTL nian foin dadaun toka di’ak tebes no ha’u foin dadaun haruka sira koko iha ne’e ha’u rona sira toka di’ak tebes, ba oin ita sei prevee osan tan atu fortifika formasaun ida ne’e ba iha futuru, hodi hadi’a liu tan kualidade membru PNTL sira iha banda muzíka nian,” nia hateten.
Nune’e mós Komandante Unidade Sentru Formasaun no Treinu Metinaro F-FDTL Koronél Cesário Marçal Ximenes “Haksolok”, tanba formandu sira iha kapasidade hodi aprende banda múzika ho durasaun fulan-ida de’it.
“Ita presiza ba malu liu hosi esprensia ne’ebé ita iha, ha’u hanoin osan iha karik PNTL prevee de’it ho kooperasaun ne’ebé maka iha ita bele aprende hamutuk hodi dezenvolve ita-nian banda muzika instituisaun rua nian,” Haksolok hateten.
Nia promete katak instrutór husi instituisaun F-FDTL sei nafatin iha disponibilidade atu tulun PNTL hodi oferese formasaun banda múzika ba membru Polisia sira bainhira iha nesesidade.
Jornalista : Natalino Costa
Editór : Agapito dos Santos
