Profesór iha EBC Raifun la sufisiente
BOBONARO, 26 abril 2022 (TATOLI) – Profesór iha Ensinu Báziku Sentrál (EBC, sigla portugés) Raifun, postu administrativu Maliana, munisípiu Bobonaro, la sufisiente tanba to’o agora Ministériu Edukasaun, Juventúde no Desportu (MEJD) seidauk prienxe fatin profesór reformadu na’in-tolu.
Diretór EBC Raifun Patrício Duarte, hateten MEJD tenke prienxe fatin profesór reformadu na’in-tolu ne’e tanba daudaun ne’e enfrenta hela difikuldade menus rekursu umanu.
Profesór na’in-tolu ne’e tama ona idade reforma iha tinan 2021, maibé to’o agora MEJD seidauk prienxe fali profesór foun ba fatin mamuk ne’e, entaun difikulta tebes dirijente eskola sira atu halo divizaun tarefa ba profesór sira.
Daudaun ne’e pofesór ne’ebé hanorin iha EBC Raifun hamutuk 42 kompostu hosi kontratadu na’in-ualu no permanente na’in-34.
“Ami presiza aumenta liu mak parte disiplina ne’ebé maka relevante ho ezame nasionál, liuliu língua portugés, Matemátika no Siénsia Teknolojia ,” nia hateten iha Raifun, tersa ne’e.
Durante ne’e atu fasilita estudantes sira hetan edukasaun hanesan, dirijente eskola ne’e buka meiu hodi taka fali profesór sira seluk hodi kompleta fali disiplina ne’ebé profesór laiha ne’e, hodi hein subtituisaun prfesór foun hosi Ministériu Edukasaun, Juventude no Desportu.
Totál sala aula iha EBC Raifun hamutuk 16 kompostu hosi sala definitivu 10 no sala emerjénsia neen, maibé kondisaun atuál la sufisiente ona.
“Tanba labele akumula labarik sira to’o na’in-50 kada turma, liuliu primeiru no segundu siklu, tenke uza meza no kadeira ein-grupu, ne’ebé ami fahe grupu ladi’ak tanba fatin la sufisiente atu profesór sira la’o tún sa’e hodi halo vijilánsia ba labarik sira,” nia hateten.
Enkuantu estudante EBC Raifun ho totál estudante hosi primeiru-anu to’o terseiru-siklu hamutuk 1.332.
Tuir observasaun Agência Tatoli nota iha terrenu katak, eskola refere movimentasun komunidade tantu ema la’o-ain no transporte hanesan karreta ho motorizada livre tanba laiha moru protesaun atu asegura infraestrutura iha eskola refere iha ambiente hakmatek.
Jornalista : Sérgio da Cruz
Editór : Evaristo Soares Martins
