Top

TDD buka hela subtituisaun Juiz ba prosesu kazu “Kalohan”

Juiz Administradór Tribunal Distritál Dili (TDD), Afonso Carmona. Imajen/Dok. Tatoli

DILI, 27 abríl 20222 (TATOLI)- Juíz Administradór Tribuál Distritál Dili, Afonso Carmona, hateten daudaun ne’e buka hela juíz ida hodi subtitiu juíz ne’ebé antes ne’e kaer prosesu ba arguidu António da Conceição ‘’Kalohan’’ atuál membru Parlamentu Nasional (PN), tanba tuir hela formasaun juíz iha Portugal.

“Tribunál Distritál Dili iha Juíz nain-10 maka kaer kazu penál, iha nain-rua agora tuir formasaun Juíz nian iha Portugál. No Juíz prosesu ne’ebé kaer kazu António da Conceição  nian agora iha hela Portugál tuir formasaun Juiz nian,” Afonso Carmona, hateten ba jornalista sira iha TDD, kuarta ne’e.

Notísia Relevante :PN hasai ona imunidade ba deputadu António da Conceição ‘Kalohan’

Tribunál Distritál Dili, daudaun ne’e identifika hela juíz ida hosi TDD nian atu subtitui juíz José Pedro Camões, ne’ebé antes ne’e fó asisténsia legál ba António da Conceição “Kalohan”, maibé juíz ne’e sei iha relasaun familia ho arguido.

“Tanba ne’e, ami haruka ona karta ba Tribunál Rekursu atu indika Juíz Titulár ida hodi sai hanesan Juíz prosesu ba kazu Deputadu prosesu kazu António Conceição nian,” nia hateten.

Nia garante Tribunál Dili sei hetan ona  juíz foun hodi prosesa kazu ne’e. “Espera semana ne’e ita bele rezolve kestaun ne’e ita bele hetan ona Juíz Titulár ida nune’e aselera kazu ne’e,” hateten Afonso Carmona.

Entretantu, informasaun ne’ebé Agência Tatoli asesu antes ne’e, hosi MP prosesu ne’e rejista ho númeru NUC 0075/17PGGCC, MP deduz akuzasaun ho husu julgamentu iha intervensaun Tribunál koletivu, tuir artigu 236 no 14 hosi kódigu prosesu penál (KPP) hodi notifika arguidu/a na’in-lima (5) ho inisiál ADC, JIB, GPSC nu’udar kargu xefia iha Ministériu Komérsiu Indústria no Ambiente (MCIA), PMCSV nu’udar diretór hosi kompañia privada  ida no arguidu Antonio “Kalohan” nu’udar  eis-Ministru MCIA.

Faktu ne’ebé arrola hosi Ministériu Publiku (MP)  katak iha tinan 2014, MCIA iha osan atu sosa ekipamentu diversu hosi orsamentu kapitál menór ho montante global $200,000.00. Hafoin ne’e, MCIA loke konkursu públiku kompañia Kninuk Star Unipessoal Lda, sai vensedór hodi asina kontratu ho MCIA ho montante global $191,000.00, ne’ebé ikus mai Tezouru Ministériu Finansas halo pagamentu ho montante refere ba kompañia, maske iha realidade ekipamentu laboratóriu indústria sira refere, kompañia foin fornese mai iha MCIA, iha fevereiru 2015, fulan-rua depois halo tiha pagamentu, maske nune’e, ekipamentu sira kompañia hatama la kompletu to’o novembru 2015, hodi prejudika ekipamentu sira balun labele funsiona, no la utiliza to’o agora, hodi hamosu prejuizu ba Estadu Timor-Leste ho valor $143,500.00.

MP akuza arguidu/a sira ho krime pekulatu ne‘ebé previstu no punidu hosi art. 295 n° 1, krime partisipasaun ekonomia iha negósiu no administrasaun danoza, ne’ebé previstu no punidu hosi art. 299 n°. 2, no art. 274 n°. 2, krime burla agravadu, falsifikasaun dokumentu, ne’ebé previstu no punidu hosi art. 266 no 267 n°. 1, art. 274 n° 2 no art. 303, hotu-hotu hosi kódigu penál Timor-Leste.

Iha parte seluk, iha loron 26 fulan-abril 2022 ne’e, Parlamentu Nasionál hasai ona imunidade ba Deputadu, António da Conceição ‘Kalohan’, hodi hatán ba iha Tribunál Distritál Dili (TDD) nu’udar arguidu iha 29 setembru tinan ne’e.

Rezultadu votasaun hodi hasai imunidade ne’e ho votu  a-favór-49, kontra haat, abstensaun haat, branku 0 no nulu ida.

Notísia Relevante :Deputadu ‘Kalohan’-funsionáriu MKIA submete ba julgamentu

Jornalista: Natalino Costa

Editór      : Agapito dos Santos

Publisidade

Leave a Reply

Latest Post

error: Content is protected !!