Top

TDD submete hikas lista fó indultu ba dadur na’in 17

Juiz Administradár Tribunal Distritál Dili, Afonso Carmona. Imajen Tatoli/Dok.

DILI, 27 abríl 2022 (TATOLI)-Juíz Administradór Tribunál Distritál Dili (TDD), Afonso Carmona, informa  daudaun ne’e, TDD submete hikas relatóriu verifikasaun kona-ba kazu ne’ebé maka komete husi dadur hamutuk na’in 17 ne’ebé maka governu sei propoin ba Prezidente Repúblika hodi fó indultu.

Tuir planu iha Prezidente Repúblika  sei fó indultu ba dadur sira durante komemorasaun aniversairu restaurasaun independensia Timor-Leste ba dala-20, (2002-2022).

Notísia Relevante :Estabelesimentu prizionál propoin ba PR fó indultu ba prizioneiru na’in-28

Nia  hateten antes ne’e, Tribunál Distritál Dili, simu ona pedidu ida husi Servisu Estabelesimentu Prizionál no Reinsersaun Sosiál Ministeriu Justisa ne’ebé husu  ba Tribunál atu verifika dadus kona-ba kazu krime ne’ebé komete husi dadur na’in 17 ne’e.

“Tribunál iha obrigasaun atu haree fila fali kondenadu sira nia kazu, durante prazu  loron lima nia laran, hodi  halo dezisaun likidasaun pena ba kondenadu sira, bazea ba relatóriu ka rekomendasaun hosi servisu Estabelesimentu Prizionál no Reinsersaun Sosiál Ministeriu Justisa,” Juíz Adminsitradór, Afonso Carmona hateten ba jornalista sira iha TDD, ohin.

Hafoin verifika, TDD hato’o rekomendasaun balun ba Xefe Estadu atu konsidera bainhira foti desizaun hodi fó indultu ba dadur sira na’in-17 ne’e. Maibé nia la esplika detallu kona-ba rekomensaun saida maka Tribunál Distritál Dili rekomenda ba Xefe Estadu atu tetu molok foti desizaun ikus.

“Tribunál bele halo desizaun hodi rekomenda ba Xefe Estadu atu fó indultu ba kondenadu sira ne’e, maibé depende ba Prezidente Repúblika maka sei haree no deside,” Nia afirma.

Tanba, tuir lei konotasaun pena no lei indultu nian, kondenadu ne’ebé maka komete  krime hanesan, violensia doméstika, ómesidiu, krime droga , labele hetan indultu.

Kritéria atu hetan indultu husi PR maka dadur sira tenke tenke kumpre ona um terço de pena ou tanba razaun umanitária katak kestaun ida no moras.

Entertantu, tuir lei númeru 5/2016, 25 maiu, artigu 7 alínea d hateten, Ministru Justisa hato’o de’it prosesu pedidu indultu, bele mai hosi dadur, família, defeza ka kestaun ho kondisaun moras no kompeténsia atu deside mai hosi Xefe Estadu, bazea ba konstituisaun artigu 85, númeru 1 hateten Prezidente Repúblika de’it mak bele fó indultu ka hamenus kastigu, hafoin rona Governu.

Indultu no hamenus katigu haktuir iha Kódigu Penál ne’ebé aprova ho Dekretu-Lei númeru 19/2009 no Lei Númeru 15/2016 mak regula kondisaun no prosedimentu atu fó indultu ka hamenus kastigu, Prezidente Repúblika halo nia kompeténisa tuir lei haruka.

Notísia Relevante :PR fó indultu ba prizioneiru na’in-neen no indultu parsiál ba na’in-sia

 Jornalista: Natalino Costa

Editór       : Agapito dos Santos

Publisidade

Leave a Reply

Latest Post

error: Content is protected !!