BAUCAU, ELEISAUN, HEADLINE, MUNISÍPIU, SEGURANSA

António Armindo promete rezolve neineik preokupasaun PNTL Baucau

António Armindo promete rezolve neineik preokupasaun PNTL Baucau

Vise-Ministru Interior António Armindo bainhira hala’o enkontru ho komandu PNTL Baucau. Imajen Tatoli/Natalino Belo.

BAUCAU, 28 abríl 2022 (TATOLI) – Vise-Ministru Interior António Armindo, promete neineik preokupasaun komandu Polísia Nasionál Timor-Leste (PNTL) munisípiu Baucau nian tanba problema hotu tenke solusiona ho fazeadamente.

Vise Ministru Interior ne’e vizita komandu PNTL munisípiu Baucau ho intensaun atu hato’o kongratulasaun, fó parabéns no apresiasaun ba PNTL Baucau tanba durante serbisu iha períodu kampaña to’o realizasaun eleisaun prezidensiál la’o ho di’ak.

Maske mosu insidente kiik balun maibé governante ne’e nota katak, PNTL hahú hatudu imparsialidade, neutralidade no independente bainhira halo kna’ar seguransa durante eleisaun prezidensiál, mesmu mosu insidente ki’ik.

Nia apresia no motiva nafatin atu kontinua hatudu imparsialidade, neutralidade, disiplina, étika ba oin nafatin, hahú uza ritmu ne’e nafatin hatudu PNTL nu’udar instituisaun ne’ebé maduru iha implementasaun orden públika.

Preokupasaun ne’ebé komandu PNTL munisípiu Baucau aprezenta ba governante ne’e mak hanesan menus fasilidade hanesan karreta hodi apoia iha eskuadra postu admistrativu sira, motorizada ba Ofisiál Polisiamentu Komunitária (OPS), ekipamentu komunikasaun no rekomenda ba minisitériu atu konsidera halo promosaun diviza tanba iha membru seniór balun ne’ebé durante ne’e halao kna’ar seidauk iha promosaun diviza.

Komandante PNTL Baucau, Superintendente António de Sá liuhosi enkontu agradese ba kongratulasaun hosi governante ne’e maibé husu tau iha ajenda kona-ba preokupasaun ne’e.

“Baucau hanesan sidade daruak tanba ne’e ita presiza membru barak atu iha balansu serbisu hodi atinje objetivu misaun institusaun nian,” Superintendente António de Sá hateten.

Hatán ba preokupasaun ne’e, Vise Ministru António Armindo sei esforsu atu rezolve neineik kona-ba difikuldade ne’ebé institusaun PNTL hasoru hanesan rezolve uniforme hanesan fazeadamentu, ekipamentu hanesan transporte ne’ebé tuir planu sei sosa hamutuk 90 hodi distribui ba kada eskuadra hotu.

Nune’e mós rádiu komunikasaun no kazerna ba membru PNTL sira, rekurus umanu hanesan rekrutamentu membru foun, promosaun diviza no formasaun.

“Ita la’ós halo buat-ida dala-ida de’it hanesan kalan ita mehi, dadeersan milagre akontese, ne’e presiza tau iha orsamentu maibé fazeadamente (neineik), Baucau tinan-ne’e iha projetu atu halo kazerna, tékniku sira mai haree ona,” António Armindo halo promesa ne’e iha Vila Nova, kinta ne’e.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!