iklan

BOBONARO, HEADLINE, IMAJEN, MUNISÍPIU, SAÚDE

Moras IRA rejista aas iha Maliana

Moras IRA rejista aas iha Maliana

Xefe sentru saude Maliana, munisípiu Bobonaro, Luis Gonçalves. Imajen Tatoli/Sérgio da Cruz.

BOBONARO, 27 abríl 2022 (TATOLI) – Xefe sentru saúde Maliana, munisípiu Bobonaro, Luis Gonçalves fó-sai dadus hahú hosi fulan-janeiru to’o marsu moras Infesaun Respiratória Aguda (IRA) kontinua rejista aas iha sentru saúde refere.

Bazea ba relatoriu trsimestre dahuluk ne’ebé relata ona ba servisu saúde Bobonaro no ekamiña ona ba nasionál totál kazu IRA hamutuk 1,639 kompostu hosi mane 887 no feto 752, tuir kedas moras diarreia ho totál kazu 398 kompotu hosi mane 220 no feto 178.

“Ami durante fulan tolu ne’e rejista moras IRA ne’e maka’as,  ne’e tinan-tinan sempre okupa númeru bootliu, tuir kedas mak moras diarreia, depois moras sira seluk hanesan katar no moras sira seluk, maibé ladún barak ida,” nia informa ba Tatoli, iha kna’ar-fatin, suku Ritabou, kinta ne’e.

Nia esplika, moras IRA normalmente ligasaun direita ho ita ema bainhira hela iha ambiente no sanitária la saudável. Nune’e mós kauza hosi ema nia atetude tanba bainhira halo atividade la prátika ijiene, konserteza provoka moras ne’e bele afeta ba saúde família uma laran.

Durante ne’e moras ne’e afeta ba labarik kiik inklui ema adultu sira, tanba ne’e atu mitiga moras ne’e parte sentru saúde Maliana esforsu hodi kontinua halo promosaun saúde públika liuhosi atividade konsulta kada loron ba pasiente sira.

“Maibe nafatin labele redús tanba atetude ita ema-nia ne’e mak susar tebes atu muda, ha’u hanoin ida-ne’e presiza ita serbisu hamutuk, la’ós de’it ema saúde mesak de’it, tanba ami-nia serbisu mak konsulta tiha fó ai-moruk, maibé fila-fali ba idak-idak nia liman rasik,” nia enkoraja.

Totál pesoál saúde ne’ebé durante ne’e halo atendimentu ba pasiente sira iha postu administrativu Maliana hamutuk na’in-37 kompostu hosi permanente, kontratadu no volunatáriu.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!