iklan

EKONOMIA, HEADLINE, IMAJEN, MUNISÍPIU, OÉ-CUSSE (RAEOA)

Reabilitasaun edifísiu DNTT RAEOA konklui iha maiu

Reabilitasaun edifísiu DNTT RAEOA konklui iha maiu

Progresu reabilitasaun edifísiu DNTT RAEOA atinje ona 95%. Imajen Tatoli/Abílio Elo Nini.

OÉ-CUSSE, 28 abríl 2022 (TATOLI) – Projetu reabilitasaun ba edifísiu Departamentu Nasionál Transporte Terrestre (DNTT) iha Rejiaun Administrativa Espesiál Oé-Cusse Ambeno (RAEOA), sei konklui iha fulan-maiu tinan ne’e, tanba progresu serbisu daudaun ne’e atinje ona 95%.

“Progresu projetu reabilitasaun edifísiu servisu transporte terrestre RAEOA nian to’o ona 95%, hein de’it atu instala AC nune’e bele kompleta ona serbisu, tanba empreza hahú halo operasaun iha dezembru tinan kotuk,” Diretór Rejionál Infraestrutura iha RAEOA, Cândido dos Reis Amaral, informa ba Agência Tatoli, iha Oé-Cusse, kinta ne’e.

Nia dehan, edifísiu ne’e importante tebes, nune’e servisu DNTT atende nesesidade públiku, atu trata dokumentu transporte nian, hanesan karta kondusaun, prodús xapa-matríkula no dokumentu seluk.

“Ita hatene serbisu DNTT kontribui reseita ba konfre Estadu kada fulan ho montante boot, tán ne’e persiza hadi’a sira-nia fatin ba atendimentu, tanba bainhira tempu udan, dokumentu balu udan-been kona,” nia akresenta.

Nia fundamenta, oras ne’e funsionáriu-sira uza hela fatin provizória iha Departamentu Servisu Água Saneamentu (DSAS), tanba DNTT tutela iha Diresaun Rejionál Infraestrutura, entaun atendimentu públiku labele paradu maka uza hela fatin ne’e.

Projetu reabilitasaun ne’e ezekuta hosi empreza Dijujo Unipesoál, Lda, ho númeru kontratu, 048/2021/PA/RAEOA-ZEESM, ho valór kontratu $77,405.97 ne’ebé aloka hosi Orsamentu Jerál Estadu (OJE) 2021 durasaun serbisu durante loron 120.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!