MJ esplika lei rai ba kompañia nasionál no internasionál

DILI, 28 abríl 2022 (TATOLI)-Ministériu Justisa (MJ), iha kinta ne’e, halo ona enkontru ho kompañia nasionál no internasionál hamutuk 82 hodi esplika kona-ba lei rai ho utilizasaun rai no uma Estadu hodi halo atividade negósiu, obrigatóriu tenke selu arrendamentu ba kofre Estadu.
“Enkontru ida ohin, Ministeriu Justisa halo ho kompañia nasionál no internasionál, ne’ebé maka ami notifika sira mai iha ne’e, atu ami bele esplika ba sira kon-ba lei rai hodi nune’e sira halo tuir karik halo atividade investimentu sira selu arrendamentu,” Ministru Justisa Tiago Amaral Sarmento, iha hafoin enkontru ho emprezáriu nasionál no internasionál sira iha Caicoli Dili.
Notísia Relevante :MJ sei asina kontratu arrendamentu rai ho Pertamina Internasionál
Governante ne’e dehan, kompañia nasionál no internasionál sira tenke selu arrendamentu ba kofre Estadu bainhira uza rai-no uma Estadu hodi halo negósiu iha rai-laran.
“Ami husu ba ita-nia empreza nasionál internasionál atu kumpre lei no obedese ba lei Timor-Leste nian hodi halo atividade investimentu labele iha problema, tanba dala barak empreza bo’ot la kumpre dever selu arrendamentu enkuantu ema halo atividade negósiu ki’ik fulan-fulan selu impostu, taxa no arrendamentu ba Estadu,” nia lamenta.
Maibé nia hateten husi rezultadu enkontru ne’e, empreza barak hakarak selebra akordu ho Governu liuhosi Ministériu Justisa hodi hahú selu taxa ba kofre Estadu.
“Sira konkorda atu selebra kontratu arrendamentu ho Ministériu Justisa,” Nia afirma
Iha fatin hanesan, Jerente ba Ótel Timor, Tiago Barata, hateten nia parte kumpre ba desizaun Governu nian no prontu atu koopera ho Ministériu Justisa hodi prepara prosedimentu legal atu selu arrendamentu ba Estadu.
Nia dehan durante ne’e, Ótel Timor selu arredamentu ba Estadu Timor-Leste, tanba iha ona kontratu ho Governu anterior.
“Ami iha ona akordu arredamentu ho Estadu Timor-Leste, ami kumpre dever hodi selu saida maka lei dehan, só ami la selu divida ba Estadu partir iha 2019 tanba situasaun Covid-19, maibé ami kumpri ida ne’e,” Nia hateten.
Notísia Relevante :Tempu besik, Governu asina akordu arrendamentu rai no uma ho EUA
Jornalista: Natalin Costa
Editór : Agapito dos Santos

