DILI, 29 abril 2022 (TATOLI)–Ministériu Finansa (MF) liuhosi Diresaun Jerál Estatístika, lansa relatóriu mensál Índise Presu Konsumidór (IPK) marsu 2022, ne’ebé hatudu iha mudansa persentajen ba IPK grupu hotu sa’e +0,9%, kompara ba fevereiru sa’e +0,6%.
“Mudansa presu grupu hotu +0,9% tanba hetan kontribuisaun hosi grupu hahán no bebida la’ós alkoólika +1,2%, alkoólika no tabaku +1,3%, transporte +0,8%, uma +0,5%, ekipamentu no manutensaun mobiliáriu uma-laran +1,4% no rekreasaun no kultura +0,5%,” Diretór Jerál Estatístika, Elias dos Santos Ferreira, informa, liuhosi nota ne’ebe Agência Tatoli asesu, sesta ne’e.
Notísia relevante: Índise Presu Konsumidór fevereiru 2022 sa’e 0,6%
Enkuantu, hahán no bebida la’ós alkoólika +1,2% sa’e tamba hetan impaktu maioria hosi sub-grupu modo tahan +0,2%, mina no bokur +1,3%, foos +0,8%, produtu ai-han +3,6%, kafé, xá, no kokoa +3,6%, ikan no hahán tasi +1,6%, no susu-been, keju no manu-tolun +1,4%.
“Mudansa persentajen IPK anuál sa’e +6,0% kompara entre marsu 2022 ho marsu 2021, tanba hetan kontribuisaun hosi grupu hahán no bebidas la’ós alkoólika +7,0%, alkoólika no tabaku +18,4%, transporte +8,0%, uma +1,0%, ekipamentu no manutensaun mobiláriu uma-laran +1,7%, rekreasaun no kultura +2,0%, saúde +1,0%, hatais no sepatu +0,1% no edukasaun +2,4% ba anuál marsu 2022.
Nune’e, inflasaun Tradeable sa’e +1,2% no Non-Tradeable sa’e +0,3% iha mensál kompara entre marsu 2022 ho fevereiru 2022.
Inflasaun Tradeable sa’e +7,7% no Non-Tradeable sa’e +2,1% iha anuál kompara entre marsu 2022 ho marsu 2021.
Jornalista : Antónia Gusmão
Editora : Julia Chatarina
