iklan

HEADLINE, SEGURANSA

Operasaun kalan, Polísia Tránzitu Dili halo apreensaun ba motór 101

Operasaun kalan, Polísia Tránzitu Dili halo apreensaun ba motór 101

PNTL liuhosi Departamentu Nasionál Tránzitu no Seguransa Rodoviária (DNTSR) ho Polísia Tránzitu Munisípiu Dili kontinua halo auto stop ba viatura sira ne’ebé halo movimentu iha tempu kalan. Imajen/PNTL

DILI, 11 maiu 2022 (TATOLI)— Polísia Nasionál Timor-Leste (PNTL), liuhosi Diresaun Nasionál Tránzitu no Seguransa Rodoviária (DNTSR), halo apreensaun ba motór hamutuk 101.

Ekipa Polísia Tránzitu halo apreensaun ba motór hirak-ne’e liuhosi pasa revista iha tersa (10/05), kalan, iha área sira iha kapitál Dili hodi intensifika serbisu no halo kontrolu ba movimentu transporte iha estrada públiku ne’ebé kontra kódigu Estrada hodi asegura movimentasaun iha kapitál Dili ho hakmatek.  

“Ami pasa revista no patrulla ho tipu la’o-ain no karreta hodi konsege ba iha sasán kro’at inklui dokumentu transporte nian sira ne’ebé konsege apreensaun motór hamutuk 101,” Komandante Polísia Nasionál Timor-Leste (PNTL) Munisípiu Dili, Superintendente Xefe Henrique da Costa, informa ba jornalista sira iha Caicoli. 

Prezensa polísia iha dalan públiku, hodi halo jestaun ba viatura no tuir orientasaun Komandu hodi regulariza seguransa rodoviária, liu-liu haree ba karta kondusaun no mós asesór transporte-sira hanesan xapa matríkula, espellu no lampu laiha sei konsidera hanesan infrasaun.

“Operasaun ne’e ita halo atu asegura seremonia investidura ba Prezidente Repúblika foun no komemorasaun loron restaurasaun indepéndesia ba dala-XX,” nia akresenta.

Polísia Tránzitu Dili transporta ona evidénsia ba komandu munisípiu Dili hodi hein infratór sira ba selu koima iha banku hafoin mai foti motór.

Tuir oráriu Polísia Tránzitu kontinua halo pasa revista iha tempu kalan, hahú hosi tuku 20:00 too tuku 22:00 iha área Dili laran.

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!