BAUCAU, HEADLINE, IMAJEN, MUNISÍPIU, POLÍTIKA

Governu Sentrál presiza aselera implementasaun podér lokál no dezentralizasaun administrativa

Governu Sentrál presiza aselera implementasaun podér lokál no dezentralizasaun administrativa

Sekretáriu Jerál CMCLN Baucau, Manuel Alari da Costa Soares. Imajen Tatoli/Natalino Belo.

BAUCAU, 17 maiu 2022 (TATOLI) – Konsellu Munisipál Kombatente Libertasaun Nasionál (CMCLN, sigla portugés) Munisípiu Baucau, husu Governu Sentrál aselera implementasaun podér lokál no desentralizasaun administrativa.

Prezidente Repúblika, Francisco Guterres ‘Lú Olo’ promulga ona Lei Númeru 23/2021, 10 Novembru kona-ba Podér Lokál no Desentralizasaun Administrativa no oras ne’e públika iha Jornál Repúblika.

Konstituisaun Repúblika Demokrátika Timor-Leste prevee organizasaun Administrasaun Públika ne’ebé obedese ba prinsípiu desentralizasaun administrativa. Objetivu hosi lei ne’e atu estabelese organizasaun, kompozisaun no kompeténsia órgaun Podér Lokál, inklui kuadru jurídiku desentralizasaun administrativa Estadu nian. Órgaun ne’ebé atu implementa lei ne’e kompostu hosi Asembleia Munisipál, Prezidente Munisípiu no Vise-Prezidente Munisípiu.

Maske Lei Podér Lokál, Desentralizasaun Administrativa no Lei Eleitorál Munisipál promulga ona hosi Prezidente Repúblika, maibé munisípiu sira konsidera seidauk kompletu tanba sei presiza tán Lei Finansa Munisipál. Lei ne’e rasik to’o oras ne’e Governu liuhosi Ministériu Administrasaun Estatal seidauk aprezenta ba Parlamentu Nasionál.

Sekretáriu Jerál CMCLN Munisípiu Baucau, Manuel ‘Alari’ da Costa Soares, apela ba Baucau oan tenke hamutuk tanba desentralizasaun hanesan oportunidade nune’e presiza koopera hodi hamosu estrutura forte, liuliu intelektualidade ne’ebé iha hodi dezenvolve Baucau ba oin ho prosperiedade.

“Ita hakarak hatudu dala-ida tán Baucau ninia matenek no vontade iha responsablidade implementasaun desentralizasaun atu hamutuk koopera lori Baucau ba oin,” Sekretáriu Jerál CMCLN Baucau informa ba Agência Tatoli, iha Vila Antiga, tersa ne’e.

Konsellu veteranu konsidera tempu ona Governu Sentrál fahe podér ba Governu lokál atubele dezeña planu dezenvolvementu tuir nesesidade munisípiu nian nune’e bele responde problema povu nian.

Konsellu veteranu Baucau daudaun ne’e envolve iha membru konsellu konsultivu munisipál sempre fó sujestaun no rekomendasaun ba autoridade munisípiu maibé seidauk funsiona nu’udar órgaun kontrolu.

Nune’e, konsellu veteranu hakarak envolve bainhira establesementu asembleia munisipál iha futuru hodi ezerse funsaun nu’udar rín no na’in ba nasaun no sei fó kontribusaun ba ezekutivu atu dezenvolve Baucau.

“Futuru asembleia munisipál harii tenke forte, krítiku no iha vizaun ne’ebé di’ak nune’e fó paresér ba ezekutivu hodi ezekuta tuir nesesidade povu Baucau nian,” Alari argumenta.

Konsellu veteranu konsidera faze dahuluk ne’ebé importante tenke halo mak ordenamentu sidade Baucau, liuliu infraestrutura hanesan fatin ba edifísiu públiku, komérsiu, edukasaun no hadi’a fatin turizmu tanba nu’udar fonte reseita hodi asegura funsionamentu governu lokál.

Nia husu governu sentral aselera investimentu simente iha área Caisido, suku Tirilolo, tanba investimentu ne’e nu’udar fonte reseita ida.

Nune’e mós presiza investe maka’as iha setór agrikultura tanba Baucau iha irrigasaun barak, liuliu iha área ne’ebé natar barak hanesan iha postu Venilale, Vemasse, Baucau vila no Laga ne’ebé durante ne’e abandona no identifika sítiu istóriku no kulturál hanesan fatin abrigu ba FALINTIL sira durante luta ba libertasaun nasionál.

“Ita hein katak implementasaun podér lokál ne’ebé sei akontese mai labele influénsia polítika mak barak liu maibé presiza ema-ne’ebé espesialista, koñesementu di’ak atu ajuda duni povu,” Alari akresenta.

Munisípiu Baucau koñesidu ho naran Kulugisa ‘Kulu-tunu’ iha bé-matan barak ne’ebé fó produsaun setór agrikultura, durante okupasaun ezersítu portugés hanaran Villa de Salazar.

Dadus sensu 2010 tótal populasaun hamutuk 111.694, hosi suku 59 kompostu postu administrativu neen hanesan Baguia, Baucau vila, Laga, Quelicai, Vemasse no Venilale.

Jornalista  : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!