QATAR, 20 maiu 2022 (TATOLI)– Boxista Timor-oan Delio Anzaqeci Mouzinho, kinta ne’e, susesu iha jogu Boxe SEA Games 2021 Vietname tanba konsege mánan ho KO (knoct out) ka tuku monu Boxista Hun Kang hosi Kamboja iha rode daruak.
Delio hanesan Boxista klase layang seniór (69kg) ne’ebé prepara hosi Federasaun Boxe Amadora Timor – Leste (FBATL) atu kompete iha SEA Games.
Jogu ba atleta na’in rua ne’e hanesan jogu semi-final ne’ebé hala’o iha Jináziu nasionál Vietname. Boxista Delio uza roupa mean no Kamboja uza roupa azúl.
Iha ronde primeiru Delio konsege halo pankada makas ida ba atleta Kamboja ne’e, maibé la konsege monu. La’ós ne’e de’it Delio mós simu pankada hosi Boxista Kamboja ne’e, maibé la halo Delio monu no ikus Delio mak konsege monu boxista kamboja ne’e.
“Ha’u sente kontente no orgullu dala ida tan bele hakat ba final, jogu ohin ne’e iha loos loron restaurasaun independénsia nian, nune’e sente kontente tanba manán ne’e hanesan vitória ida fó ba ita nia nasaun,” Boxista Delio hateten ba Agência TATOLI via media sosiál.
Nia dehan, ho espirítu boxista no reprezenta nasaun Timor-Leste sei kontinua esforsu makaas liután iha jogu finál atu bele sai primeiru lugar iha jogu eventu internasionál ne’e.
Biban ne’e, Boxista Delio agradese tebes ba povu Timor-Leste nia-orasaun no matebian tomak ne’ebé mate ona klamar hodi akompaña nia too manán kompetisaun ne’e.
Ho performa brillante ne’ebé Delio hatuur lori nia ultrapasa ba finál kompetisaun Boxe iha SEA Games.
Iha eventu internasionál ne’e, Delio esforsu defende bandeira Timor – Leste atu labele hasae leet de’it iha ema nia nasaun maibé tenke hatudu rezultadu ruma.
Rezultadu ne’e hatudu duni realidade tanba konsege hamonu nasaun jigante ida nia atleta iha ronde dala-rua.
Iha jogu primeiru faze Delio konsege konkista nia Vitória hodi tuku monu Boxista hosi Malázia ho naran Mohamad Firdaus iha ronde da-toluk.
Tuir oráriu, Iha jogu finál Delio sei kontra atleta hosi Filipina iha loron domingu (22/05). Nune’e nia husu atu povu Timor – Leste nafatin apoiu nia ho orasaun atu bele fó rezultadu di’ak no hamorin Timor – Leste nia naran.
Notísia relevante: Boxista Timor-Leste halakon Malázia iha SEA Games
Jornalista: Hortencio Sanchez
Editór : Florencio Miranda Ximenes
