DILI, EDUKASAUN, HEADLINE, NASIONÁL

Konstrusaun EBC Sergio Vieira de Melo Becora gasta osan $ 149,587.82

Konstrusaun EBC Sergio Vieira de Melo Becora gasta osan $ 149,587.82

Prosesu konstrusaun edifísiu andar rua iha Eskola Bázika Sentrál (EBC, sigla portugés) Sergio Vieira de Melo Becora besik atinje 100%. Imajen Tatoli/Tomé Amado.

DILI, 04 juñu 2022 (TATOLI)–Prosesu konstrusaun edifísiu andár foun rua iha Eskola Báziku Sentrál (EBC) Sergio Vieira de Melo Bekora (SVDMB) besik atinje 100% tanba konstrusaun andár rua ne’e ida atinje ona 95% no ida seluk atinje ona 80%, hodo gasta Orsamentu Jerál Estadu kuaze $149,587.82.

Diretór Eskola Baziku Sentrál Sergio Vieira de Melo Becora, Afonso Soares, hateten konstrusaun edifísiu andár foun rua ho sala-de-aula 10 ne’ebé kompostu hosi andár ida sala-de-aula haat (4) no andár ida seluk ho sala-de-aula neen (6) ne’e konstrui hosi empreza Delatina Unipesoál, Lda, ho númeru konstrusaun NCB 06/MEJD/DNA/2021.

“Agora daudaun ne’e prosesu plamir de’it ona hodi pinta, ne’ebé iha tempu besik ne’e bele finaliza ona. Tanba konstrusaun fíziku ramata to’o taka hotu ona zinku inklui mós halo hela plafon,” Afonso Soares hateten ba Agência Tatoli iha eskola SVDM Becora, sábadu ne’e.

Kontratu ne’ebé Ministériu Edukasaun Juventude no Desportu halo ho kompañia Delatina Unipesoál, Lda, ne’e hahú iha dezembru 2021 ne’ebé ninia durasaun servisu fulan lima tenke ramata, ne’ebé hahú iha janeiru to’o maiu 2022.

“Tanba mosu fallansu tékniku, entaun konstrusaun ne’e tenke tama to’o juñu. Maibé kuandu haree ba prosesu hotu fiar katak juñu ne’e kompañia sei ramata konstrusaun ne’e,” nia dehan.

Prosesu konstrusaun edifísiu andar rua iha Eskola Bázika Sentrál (EBC, sigla portugés) Sergio Vieira de Melo Becora besik atinje 100%. Imajen Tatoli/Tomé Amado.

Entretantu edifísiu andár rua ne’ebé MEJD halo ona ba estudante sira iha eskola EBC SVDM ne’e sei finaliza iha tempu besik, atu nune’e bele responde nesesidade estudante 1,155 ba turma tolu, ne’ebé tuir planu turma dadeer hahú eskola hosi tuku 08h00-11h00 sai tiha tama fali turma segundu hahú hosi 11h20-14h00 hafoins kontinua fali ho turma terseiru hahú hosi 14h20-17h00.

Ministériu Edukasaun Juventude no Desportu liuhosi ninian planu no programa ba tinan ida-ne’e hakarak hadi’a no harii eskola foun iha territóriu nasionál hamutuk 203, atu nune’e bele apoiu estudante sira hodi hetan prosesu ensinu aprendizajen ida adekuadu.

Ne’eduni ho prosesu sira-ne’e hotu kuaze eskola sira-ne’ebé mak tama iha planu konstrusaun no reabilitasaun ne’e hahú ona prosesu sira atu bele kumpre durasaun tempu ne’ebé mak Governu liuhosi MEJD kontrata ona ho kompañia inklui grupu komunitária sira.

Ho nune’e, iha eskola ensinu Báziku Central Sergio Vieira de Melo Becora ne’e hetan mós projetu konstrusaun ne’ebé Ministériu Edukasaun rasik loke prosesu konkursu atu harii eskola andár rua ho orsamentu $149,587,82, hodi bele tulun prosesu ensinu aprendizajen ne’ebé di’akliu ba estudante sira.

Jornalista : Tomé Amado

Editór       : Cancio Ximenes

iklan
iklan

Leave a Reply

iklan
error: Content is protected !!