UFP detein sidadaun na’in-rua hatama mina-sona ilegál

DILI, 07 juñu 2022 (TATOLI)— Polisia Nasionál Timor-Leste (PNTL) liuhosi Unidade Patrullamentu Fronteira (UPF), segunda (06/06), tuku 23:00, kalan, konsege detein sidadaun na’in-rua ne’ebé hatama mina sona ilegál kaixa hamutuk 15.
Komandante Unidade Patrullamentu Fronteira (UPF), Superintendente Euclides Belo, informa membru UPF detein sidadaun Timor-oan nain-rua ho inisiál ADS no BB iha área fronteira iha suku Tapo Memo, postu administrativu Maliana, munisípiu Bobonaro.
Notísia relevante: UPF detein feto ida hatama sigarru ilegál hosi Atambua
“Ita nia kompañia Alfa hosi unidade UPF halo pasa revista ba ema no sasan hodi konsege detein sidadaun nain-rua no halo apreensaun ba sasan mina-sona kaixa hamutuk 15. Dadaun suspeitu sira UPF sei halo hela identifikasaun ba sira,” Superintendente Euclides Belo, hateten ba jornalista sira iha Timor-Plaza, Dili, tersa ne’e.
Nia dehan, fó ona orientasaun atu membru UPF atu koordena ho parte Autoridade Aduaneiru (AA/Alfándega) no Diresaun Nasionál Kuarantina atu halo prosesu investigasaun ba suspeitu sira tuir lei ne’ebé maka iha.
“Ita halo ona vijilánisia makas ona iha fornteira Terrestre liuhosi operasaun no pasa revista atu kombate ema ho sasán tama-sai ilegál,” nia afirma.
Notísia relevante: UPF detein Timoroan na’in-rua importa manu madena ilegál
Jornalista: Natalino Costa
Editór : Florencio Miranda Ximenes

